Жуырда қоғамдағы маңызды мәселелерге талдау жасау үшін құрылған Sarap сарапшылар клубының басқосуы өтті. «Рухани жаңғыру» қазақстандық қоғамдық даму институты ұйымдастырған жиында Мемлекет басшысы Қасым-Жомарт Тоқаевтың пандемиядан кейінгі ауыр кезеңде елдің одан әрі дамуы мен денсаулық сақтау жүйесінің тиімділігін арттыруға бағытталған бастамалары кеңінен талқыға түсті.
Отырысқа елімізге белгілі бірқатар саясаттанушылар, сарапшылар мен қоғам қайраткерлері қатысты. Олардың арасында «Рухани жаңғыру» ҚҚДИ басқарма төрағасы Асылбек Есенбаев, ҚСЗИ қоғамдық-саяси зерттеулер бөлімінің басшысы Индира Рыстина, ЕҰУ «Экономика» кафедрасының меңгерушісі Жібек Рахметулина, «Рухани жаңғыру» орталығының стратегиялық талдау тобының жетекшісі Ләззат Нұрқатова секілді азаматтар бар екенін айта кеткен жөн. Әуелі «Рухани жаңғыру» ҚҚДИ басқармасының төрағасы Асылбек Есенбаев Жолдауда жақын арадағы негізгі басымдықтар айқындалғанын айта келе, әлеуметтік мәселелер мен халықтың әл-ауқатын арттыруға арналған нақты бес бастаманың ерекшелігі жайында сөз етті. «Біріншіден, Жолдауда Мемлекет басшысы іс-әрекетінің логикасы мен жүйелілігі айқын байқалады. Бұл Елбасы саясатымен сабақтастығына да, өзінің стратегиялық және тактикалық әрекеттеріне де қатысты. Мұнда бірнеше мысал келтірілген. Мемлекет басшысының зейнетақы жинақтары мен салық жүйесін жаңғырту жөніндегі идеялар сабақтастығы жалғасын тауып жатқанын көріп отырмыз. Ауызсу, көлік инфрақұрылымы, мемлекеттік сатып алулар, Ұлттық қорды пайдалану жөніндегі өте маңызды мәселелер оның назарында», – деді басқарма төрағасы. Есенбаевтың айтуынша, Жолдаудың экономикалық, әлеуметтік және әдістемелік аспектілеріне қысқаша тоқталуына мына екі себеп әсер еткен көрінеді. «Жолдауда аталған бірыңғай Әлеуметтік кодексті әзірлеу идеясы мемлекеттік органдардың қызметін оңтайландырудан гөрі азаматтарға ыңғайлы болуға бағытталған. Біріншіден, стратегиялық құжаттың тұтастығын және Мемлекет басшысының тактикалық жан-жақтылығын атап өткім келеді. Меніңше, ол қарапайым шешімдердің, нақты жобалардың және нақты көрсеткіштердің жақтаушысы. Кейде гуманитарлық бағыттар жетіспей жататын, сол сияқты шешім ұсына алмай жатқан тұсымыз болады. Екіншіден, азаматтардың өз-өзін тануы мен Жолдауда көтерілген жеке құндылықтар жүйесін қалыптастыру мәселелері біздің институттың тікелей құзыретіне жатады және бұл тақырып сіздің кәсіби қызығушылықтарыңыздың салаларымен тығыз байланысты болғандықтан, біздің бүгінгі әңгімеміз осы бағытта өтеді деп күтеміз», – дейді басқарма төрағасы. Бұдан кейін «Рухани жаңғыру» қоғамдық даму институты Қоғамдық процестерді зерттеу орталығының жетекшісі Қазбек Майгелдинов қоғамдағы процестерді талдап, зерттейтін сарапшылар алаңының мақсатын түсіндірді. Оның ойынша, қоғамдағы жайттарды талдап, уақытылы баға беретін саяси алаңдардың аздығы байқалып жүр. Сол себепті сарапшылар алаңының болуы маңызды. «Биылғы Жолдаудың бірнеше ерекшелігі бар. Әсіресе, пандемиядан кейінгі жалпы ішкі даму бойынша басты бағыттарды Президент атап өтті. Дегенмен күн тәртінде Жолдау аясындағы берілген басымдықтарды және Жолдаудың маңызы, стратегиялық бағыттарын түсіндіру, талқылау тұр. Жолдауда көпшілік күткен жайт – халықтың әл-ауқатын арттыру. Пандемия кезінде елдің әлеуметтік жағдайы ең түйткілді мәселенің бірі болды. Яғни, көпбалалы аналардың талабы — жұмыссыздық және шағын, орта кәсіпкерлік. Биылғы Жолдау – пандемиядан сабақ алып, енді одан шығу жоспары. Дәлірек айтсақ, Президент дәрігерлер мен мұғалімдердің еңбегін бағалау керегін үнемі айтады, нәтижесінде олардың жалақысы көтерілді», – деді Майгелдинов. Өз кезегінде ҚСЗИ қоғамдық-саяси зерттеулер бөлімінің басшысы Индира Рыстина Жолдаудың құжат қана емес, жалпы мемлекеттік жобалаудың негізгі құралы ретінде бекітіліп отырғанын баяндады. «Президент Жолдауы бүгінде тек қана құжат ретінде емес, бұл жалпы мемлекеттік жобалаудың негізгі инструменті ретінде бекітіліп отыр. Жолдауда айтылған дүниелер ары қарай мемлекеттік жобалау, жоспарлау жұмыстарының алдында тұратын құжат болып келеді. Саяси блокты талдауға көшетін болсақ, саяси модернизация төңірегінде негізгі бағыттар айқындалды. Сонымен қатар әйелдер мен жастар категориясына енді мүмкіндігі шектеулі азаматтар да кіріп жатыр. Бұл – инклюзияға деген мемлекеттің көзқарасы. Азамат құқығын қорғау адам құқығының мүмкіндіктерінің теңесуіне әкелетін бір фактор», – деді сарапшы. Басқосудың соңында Sarap талқысының нәтижесінде арнайы қарар қабылданатыны айтылды. Барлық ұсыныстар Ақпарат және қоғамдық даму министрлігіне резолюция ретінде жолданбақ. Сарапшылар алаңы енді Жолдау кезінде ғана емес, одан кейін де жұмысын жалғастырып, қоғамдық-саяси процестерді назарда ұстамақ ниетте.М.ТӨЛЕУ