«Nur Otan» партиясы Ақмола облыстық қоғамдық қабылдау бөлмесінде екі тұрғынның мәселесі қаралды. Олардың өтініші партиялықтардың жеке бақылауына алынды.
Атап айтқанда, өтініш иесі ерейментаулық Қайша Жолдасбаеваның тұрып жатқан үйінің маңайында сібір жарасымен ауырған малдың қорымы бар екені 2007 жылы анықталған болатын. Сондықтан зейнеткер жергілікті әкімдіктен қауіпсіз жерден үй немесе қаржы бөлуді сұрап, біраз уақыт бұрын арызданған. Өтініші қанағаттандырылмағандықтан, әкімдіктің түсінігін заңсыз деп сотқа жүгінген. Нақты дәйектер келтірілмегендіктен, сот та істі кері қайтарған. Денсаулығына қауіп төнетінін алға тартып, Қайша Нұрышқызы соңғы үмітін арқалап «Nur Otan» партиясының Ақмола облыстық филиалының қоғамдық қабылдауына жазылған. Төрағаның бірінші орынбасары Ғалым Бекмағамбетов өтініш берушінің арызын мұқият тыңдап, Ерейментау аудандық әкімдігіне аталған мәселені егжей-тегжейлі зерттеп, 2 ай уақыт ішінде оң шешу мүмкіндігін қарастыруды тапсырды. Мәселе партияның бақылауына алынды. Қоғамдық қабылдауда, әсіресе жетім мен жесірлердің, әлеуметтік аз қамтылған отбасылардың мәселелеріне үлкен көңіл бөлінеді. Сондықтан жетім қалған студенттің ешкімге қол қусырмай, табыс табуына мүмкіндік қарастыруды сұраған көкшетаулық Ирина Нусстың өтініші де бірден оң шешімін тапты. Қаладағы жоғары техникалық колледжінің 2-курсында оқитын бозбала оқуын жұмыспен ұштастырғысы келеді. Яғни, ол «Тыныс» акционерлік қоғамына жұмысқа орналасқан. Сондықтан бұл мәселені шешу мақсатында колледж басшысына телефон шалынды. Дуальді оқыту бойынша аталған мәселе оңтайлы шешілмек. Партия бұл сұрақты да жеке бақылауына алды.А.ЖАСАНҰЛЫ