Қызылорда облысындағы 357 мемлекеттік органда 3 мың 390 мемлекеттік қызметші аймақ дамуына қызмет етеді. Олардың 1 мың 551-і – әйел. Басшы лауазымдағы арулар саны 359-ды құрайды. Басшылық қызметтегі бұрымдылар сапына биыл Эльмира Қазиева да қосылды. Ол биыл 25 шілдеде елімізде тұңғыш рет өткізілген ауыл әкімдерін сайлау науқанында жеңіске жетіп, Қармақшы ауданындағы Ақай ауылының әкімі атанды. Жаңа науқанның алғашқы жеңімпазы атанған Эльмира Ордабайқызымен сұхбаттасып, алдағы жоспарымен бөлісуді жөн көрдік...
– Эльмира Ордабайқызы, елімізде алғаш рет өткізілген ауыл әкімдерін сайлау науқанындағы жеңісіңізбен құттықтаймыз. Жаңа қызметіңізге сәттілік тілей отыра, ел үшін етер еңбегіңіздің еселене түсетініне сенеміз. Ауыл әкімі болу да ауыр жүк екенін білеміз, әйел затына бұл лауазым қиын тимей ме? – Гендерлік саясат – гендерлік теңдікке қол жеткізуге бағытталған мемлекеттік және қоғамдық қызмет. Ал гендерлік теңдік дегеніміз – әлеуметтік функцияларды орындау кезінде жынысына қарамастан әйелдер мен ерлердің ресурстар мен игіліктерге тең дәрежеде қол жеткізуі. Бұған дейін де Сыр өңірінде аудан, ауыл басқарған апаларымыз жетерлік. Олардың бәрі ерлермен иық тіресе қызмет етіп, туған жердің гүлденуіне өлшеусіз үлес қосты деп айта аламын. Өзіңіз білесіз, біздің аймақты да қазір әйел адам басқарады. Еліміз бойынша тұңғыш рет біздің өңірде әйел адам облыс әкімі лауазымына қол жеткізді. Ол кісінің жұмысына бүгінде ел тұрғындары оң бағасын беріп жатыр. Сондықтан да әйел затына ел басқару аса қиын тимейді деген ойдамын. Әрі «Nur Otan» партиясы да бұл мәселеге айрықша көңіл бөліп отыр. – Сізді әкімдікке сайлауға түсуге елді мекеннің қандай мәселелері түрткі болды? Жалпы, әкім болудағы мақсатыңыз... – Ақай ауылдық округі 2005 жылғы сәуір айында Төретам кентінен бөлініп, ауылдық округі болып құрылғаннан 2018 жылға дейін әкім аппаратында 13 жыл үздіксіз қызмет атқардым. Осы жылдары халықпен етене араласып, тұрғындардың тыныс-тіршілігімен таныспын. Түрткі болған мәселе – Ақай ауылын көркейтіп, абаттандыру және халықтың тұрмыс-тіршілігін жақсарту. Осы кезеңге дейінгі алған білімімді және өмірден жинақтаған іс-тәжірибемді округ тұрғындарының әл-ауқатын және шаруашылық құрылымдарының экономикалық нығаюына жұмсасам деймін. – Ел басқаруда бұрынғы әкімдерге қарағанда қандай жаңашылдықтарды қолға аласыз? – Жоғырда осыған дейін мемлекеттік қызметтің бірталай сатысында болғанымды тілге тиек еттім. Сондықтан бұл салада тәжірибем бар. Қазір әлеуметтік желі дамыған заман. Бүгінгі эпидахуалға қарамастан елмен етене болудың мүмкіндігі мол. Сол себепті жұмыс жоспарларымды үнемі ауыл тұрғындарымен ақылдаса отырып бекітіп, атқарылған істерді оларға баяндап, халықпен тығыз байланыста болғым келеді. – Қызметке кіріскенде ең алдымен қай мәселені қолға алдыңыз? Шешімін тауып келе ме? – Ең алғаш мәселе көшелерге орташа жөндеу жұмыстары. Құдайға шүкір, ауылымыздың 7 көшесіне орташа жөндеу жұмыстары жүргізілді. Алдағы уақытта қалған көшелерді де заманға сай көркейте бермекпіз. – Сайлауалды бағдарламаңыздағы негізгі мәселелерді атап өтсеңіз... – Сайлауалды бағдарламамда 2021-2025 жылдары ауылішілік көшелерді орташа және күрделі жөндеуден өткізу мәселесін шешуді қарастырдым. Жаңа айтып өткенімдей, бұл жұмыстарды бастап та кеттік. Содан кейінгі ең маңызды жоспарымның бірі – 2022-2025 жылдары ауылды газбен жабдықтауға ықпал ету. Одан бөлек, елді мекен тұрғындары арасында кәсіпкерлікті жандандыру да жүйелі түрде жүзеге асса деймін. Өйткені кәсіпкерлік саласына мемлекеттен жасалып жатқан қолдау жеткілікті. Әрбір ауыл әкімі кәсіп бастаймын деген халыққа қолдау көрсетіп, бағыт-бағдар берсе, ауылдарда жұмыссыздық деңгейі азаяр еді. Біздің Ақай ауылының кәсіпкерлік саласын дамытуға мүмкіндігі мол. – Осы өзіңіз айтып отырған жоспарыңызды орындауға берілген мерзім жеткілікті ме? Осы аралықта орындауға толық мүмкіндігіңіз бар ма? – Әрине, толық мүмкіндік бар. Сөз басында айтқанымдай, көшелерге жөндеу жұмыстары күн тәртібінен түспейді. Ал ауылды газдандыру мәселесіне келетін болсақ, алдағы уақытта Ақай ауылын көгілдір отынға қосу жоспарланған. Тартылатын газ құбырлары мен орамішілік газ тарату желілерін салу құрылысына мемлекеттік сатып алу жұмыстары жүргізіліп жатыр. Кәсіпкерлікті дамыту бойынша тұрғындармен тығыз байланыста жұмыс істеймін. – Бұл мерзім өткен соң келесі сайлауға да түспек ойыңыз бар ма? – Қазақта «балапанды күзде сана» деген нақыл сөз бар. Сол секілді осы мерзімде атқарған жұмыстарымның көрсеткіші келер сайлау жақындағанда белгілі болады. Ол кезде мен сайлаушыларымның сенімінен шыға алдым ба, жоқ па, айқындалады. Сондықтан бұл сұрақтың жауабын уақыттың еншісіне қалдырсам. Себебі маған ауыл тұрғындарының жұмысыма берген бағасы маңызды. – Уақыт бөліп, әңгімелескеніңізге көп рақмет!Сұхбаттасқан Ерқанат СӘРСЕНБАЙҰЛЫ, Қызылорда облысы