Түркістан облысында «Nur Otan» партиясының сайлауалды бағдарламасын орындау жөніндегі Жол картасының жүзеге асырылу барысы облыс әкімі Өмірзақ Шөкеевтің төрағалығымен өткен мәжілісте талқыланды. Онда Жол картасы аясында аталған облыста жыл басынан бері 363,5 мың шаршы метр тұрғын үй берілгені, 10 541 адам тұрақты жұмыспен қамтылғаны, 13 кәсіпорын ашылып, 1 665 адам жұмысқа орналасқаны, 7 жаңа мектеп пайдалануға берілгені айтылды.
Жол картасының орындалуы бойынша «Nur Otan» партиясы Түркістан облыстық филиалы төрағасының бірінші орынбасары Бейсен Тәжібаевтың баяндамасы тыңдалды. Оның сөзінше, сайлауалды бағдарламаның орындалуы партия филиалының қатаң бақылауына алынып, тұрақты түрде зерделеу жұмысы жүріп жатыр. 2021 жылы облыстық Жол картасы бойынша 110 индикатор жоспарланса, оның 25-і орындалған.
Аудандық, қалалық Жол карталарында жоспарланған 1 418 индикатордың 668-і, яғни 47 пайызы жүзеге асқан. Осы және өзге деректерге тоқталған баяндамашы сайлауалды бағдарламаны орындау барысындағы қиындықтар мен мәселелерді шолып өтті. Сонымен қатар ол есеп беру кезінде «Жол картасы бойынша жылына 2 рет аудан, қала әкімдерінің есептері тыңдалса» деген ұсынысын қоса жеткізді.
Отырыста Түркістан облыстық Стратегиялық және стратегия және экономикалық даму басқармасының басшысы Қ.Қайыпбектің баяндамасы тыңдалды. Ол Жол картасы аясындағы жұмыстармен қатар «Ауыл – ел бесігі» жобасының жүзеге асырылу барысын баяндады. 2021 жылы 70 ауылдық елді мекенде 302 жобаға 16,1 млрд теңге бөлінген. Іске асыру жоспарланған жобалар аясында білім, денсаулық, спорт саласында жаңа нысандар бой көтеріп, аудан, қалаларда инфрақұрылым жаңарады. Жыл қорытындысымен 280 нысанды пайдалануға тапсыру жоспарланса, бүгінде 95 жобаның жұмысы аяқталған. Оның ішінде 91 көше орташа жөндеуден өтіп, 4 мектепке күрделі жөндеу жұмысы жасалды.
Мәжілісті қорытындылаған облыс әкімі, партия филиалының төрағасы Өмірзақ Шөкеев сайлауалды бағдарлама өңірдің даму тұжырымдамасымен ұштасатынын айтты. Жол картасындағы әрбір индикаторды сапалы әрі уақытылы орындау жөнінде тапсырма беріп, барлық аудан, қала әкімдері мен басшыларға бұл іске жауапкершілікпен қарауды тапсырды. Жол картасын орындау барысындағы өзекті мәселелерді жылдам анықтап, жұмысты тоқтатпау керегін жеткізді.
Әбілмансұр ЖАСАН
