СҚО тұрақтандыру қорында 3 мың тоннадан астам өнім бар. Азық-түлік өнімдерінің барлығы дерлік жергілікті тауар өндірушілерден сатып алынды. Солтүстік Қазақстан облысының тұрақтандыру қорының жұмысы туралы ақпарат «Nur Otan» партиясы СҚОФ жанындағы өңірлік даму жөніндегі қоғамдық кеңестің отырысында жарияланды.
Кәсіпкерлік және индустриялық-инновациялық даму басқармасы басшысының орынбасары Данияр Исаевтың айтуынша, 2022 жылға 5 мың 200 тоннаға жуық өнім сатып алынған. Тағы 3 935 тонна сатып алу жоспарланған. Қазір тұрақтандыру қорынан ірі көлемде қарақұмық жармасы, күріш, күнбағыс майы, ұн, макарон өнімдері, қант, тұз, құс еті мен көкөністер сатылуда. «19 атаудан әлеуметтік маңызы бар азық-түлік өнімдерінің 12 түрі 26 сауда желілерінде және тұрақтандыру қорындағы базарларда сатылуда. Ауыл шаруашылығы тауар өндірушілерінен тікелей жеткізу тетігі белсенді қолданылады. «Айналым схемасы» шеңберінде күнбағыс майын сатып алу және оны одан әрі белгіленген бағамен сату үшін «Радуга» ЖШС-не жеңілдікті қарыз берілді. Бүгінде бөлшек сауда желісінде 555 теңгеден «Майское» күнбағыс майы бар. Сондай-ақ көкөніс бағасын тұрақтандыру үшін картоп, сәбіз және пияз сатып алу бойынша келіссөздер жүргізілуде», – деді Данияр Исаев. ⠀ Сауда желілерінің, көтерме кәсіпорындардың басшыларымен және кәсіпкерлермен әлеуметтік маңызы бар азық-түлік өнімдерінің бағасын төмендету және қолдау туралы 619 меморандумға қол қойылды. Осыған қарамастан, өңірлік даму жөніндегі кеңестің төрағасы мемлекеттік органдар тарапынан бағаны негізсіз көтеретін нарық субъектілеріне бақылауды күшейтуді, сондай-ақ тамақ өнімдеріне шекті бағаларды белгілеуді ұсынды. Қоғамдық кеңесте ірі және шағын малды азықпен қамтамасыз ету мәселесі де қозғалды. Алдағы қысқы кезеңде облыс бойынша күтілетін мал басының саны шамамен 390 мың бас ІҚМ, 430 мың бас ҰММ және 134 мың бас жылқы. Мал қыстауын сәтті өткізу үшін 850 мың тонна шөп дайындау қажет. «2021 жылдың 15 қыркүйегінде облыс бойынша 833,2 мың тонна шөп дайындалды, бұл қажеттіліктің 98%-ы. Бұдан басқа, 194 мың тонна қажеттілік кезінде 197,9 мың тонна пішендеме, 194 мың тонна қажеттілік кезінде 106,7 мың тонна сүрлем және 784 мың тонна қажеттілік кезінде 242,3 мың тонна сабан дайындалды. Жеке қосалқы шаруашылықтар үшін 498,3 мың тонна шөп дайындалды, бұл қажеттіліктің 97,7%-ы. Облыс бойынша 122,6 мың аула бар, оның ішінде 62,6 мың аула Ауыл шаруашылығы малдарын ұстайды. Жедел деректерге сәйкес 61,4 мың аула немесе 98%-ы шөппен толық қамтамасыз етілген», – деп атап өтті Ауыл шаруашылығы басқармасының басшысы Мейрам Меңдібаев. Жемшөп дайындау шығындарын азайту үшін ауыл шаруашылығы тауарын өндірушілерге қосымша 4,7 мың тонна көлемінде арзандатылған ЖЖМ бөлінді, сондай-ақ өңірде ауыл шаруашылығы жәрмеңкелері үнемі өткізіледі. Сонымен қатар мемлекеттік қолдау шараларын алатын агроқұрылымдардың басшылары мен ауылдық округтердің әкімдіктері арасында халыққа азық-түлікті төмендетілген бағамен сату бойынша меморандумдар жасалды. Бұл мәселені қоғамдық кеңес мүшелері бақылауға алды. Атап айтқанда, олар Ауыл шаруашылығы басқармасына қыркүйек айының соңына дейін әр аудан бойынша жемшөп тапшылығын анықтауды, сондай-ақ күтпеген жағдайлар туындаған кезде жемшөптің жалпы қажеттілігінен 5%-ға дейінгі көлемде резервтік қор құруды ұсынды.Әбілмансұр ЖАСАН