Ұлттық қауіпсіздік комитетінің СҚО бойынша департаменті Шекара қызметімен бірігіп, Петропавл қаласының тұрғындары ұйымдастырған заңсыз көші-қон арнасының жолын кесті.
Оған қатысы бар адамдар тұрғын үй пәтерінде жалған құжат жасайтын «жасырын» цех ашқаны анықталды. Онда «026/у нысанына сәйкес диагноз бен емделу мерзімін растау үшін аумақтық амбулаториялық-емханалық ұйымның дәрігерлік-консультациялық комиссиясының қорытындылары», «шетел медициналық ұйымдарынан емделуге шақыру хаттар», «ПТР-тестілер» секілді қоғамда қазір жоғары сұранысқа ие анықтамалар әзірленген. Бұл құжаттар карантин шектеулері қолданылған кезде Ресеймен арадағы шекараны кедергісіз кесіп өту үшін Қазақстан азаматтарына сатылған. Тінтулер барысында қазақстандық және ресейлік медициналық ұйымдардың мөрлері, облыстың клиникалық-диагностикалық зертханасы мен емханасының ПТР-тестілерінің қорытындылары әшкереленді. Осыған орай Қылмыстық кодекстің 394-бабы 2-бөлігі – «адамдар тобы алдын ала сөз байласып жасаған заңсыз көші-қон» фактісі бойынша сотқа дейінгі тергеп-тексеру жүргізілуде.Елдос СЕНБАЙ