«Nur Otan» партиясының Жамбыл облыстық мәслихаттағы депутаттық фракциясының және «Өңірлік даму» қоғамдық кеңесінің бірлескен отырысы өтті. Күн тәртібінде партияның сайлауалды бағдарламасын іске асыру жөніндегі өңірлік Жол картасының орындалу барысы қаралды.
Жалпы, 2021 жылдың 8 айының қорытындысы бойынша өңірлік Жол картасындағы 1 073 іс-шараның 322-сі орындалды, 516-сы орындалу сатысында. Жол картасына сәйкес, биыл облыста пайдалануға берілген тұрғын үйлердің жалпы көлемі 329,5 мың шаршы метрді құрап, өткен жылдың тиісті кезеңінен 16,4%-ға артты. Сондай-ақ cүт өңдеу және ірімшік өндіру цехы, «Темірбетон бұйымдар» зауыты және консерві өндірісін ұйымдастыру және көкөніс сақтау қоймасы жобалары іске асырылды. Бұдан бөлек, Тараз қаласында «ПАЗ», Golden Dragon маркалы үлкен сыйымдылықты 32 автобус ел игілігіне берілді. Қазір мәдениет, спорт, білім және денсаулық нысандарының құрылысы жүргізіліп жатыр. Сонымен қатар Жол картасындағы 11 іс-шараның орындалмау қаупі бар. Жауаптылардың мәліметінше, жоспарланған жобаларға бөлінген қаржының жеткіліксіздігі жұмыстарды кешеуілдетіп жатыр. Республикалық бюджеттен бөлінген қаржының қысқартылуы себебінен кей нысандардың құрылысы аяқталған жоқ. «Өңірлік даму» бойынша қоғамдық кеңесінің төрағасы, фракция жетекшісі М.Ескендіров: «Мәселені шешуге салғырттық танытып, жүйелі жұмыс жүргізбеген жауаптыларға шара қолдану қажет екенін жеткізсе, филиал тарапынан партия мүшелерінің дербес жауапкершілігі қаралатынын ескерттім. Себебі халыққа берілген уәде, олардың сұранысы мен тілегі уақытылы әрі сапалы орындалуы тиіс», – дейді ол. Бұдан бөлек, жиында моно және шағын қалаларды дамыту бойынша мәселелер қаралды. Шу, Қаратау және Жаңатас қаласының әкімдері мен әкімдіктің жауапты өкілдері аймақты абаттандыру және қаланы көркейту бағытында тиісті жұмыстар жүргізіліп жатқанын жеткізді. Дегенмен кемшіліктер де жетерлік. Бұл туралы айтқан облыстық мәслихат депутаттары осы бағытта қандай жұмыстар атқарылып жатқаны жөнінде сауалдарын қойды. Жиын соңында «Nur Otan» партиясының депутаттық фракциясы мүшелерінің рейтингі бойынша атқарылған жұмыстары талқыланды.Әбілмансұр ЖАСАН