«Үйге барып, демаламын...» – бұрынғы Премьер-министр Серік Ахметов жазасын өтеп бітті
1 қыркүйекте оған тағылған барлық шектеулер алынып тасталды, – деп жазады zakon.kz.
Қылмыстық атқару жүйесі комитеті биылғы жылдың 1 қыркүйегінде өз жазасын өтеп болуына байланысты Серік Ахметовтың тіркеуден алынғанын хабарлады. Енді ол белгілі бір лауазымдарды атқаруға тыйым салатын қосымша жаза бойынша ғана пробацияда есепте тұр.
2015 жылдың желтоқсанында Серік Ахметов бюджет қаражатын жымқырды, қызмет бабын асыра пайдаланды және кәсіпкерлік қызметке заңсыз араласқаны үшін бес жыл мемлекеттік қызмет атқару құқығынан айырыла отырып, мүлкі тәркіленіп, 10 жылға бас бостандығынан айырылды.
Ахметов кінәсін мойындамады, дегенмен ол өзіне артылған сенімді ақтамағаны әрі алаңдатып қойғаны үшін Қазақстанның Тұңғыш Президенті Нұрсұлтан Назарбаевтан кешірім сұрады.
2016 жылдың наурызында оның мерзімі 8 жылға дейін қысқартылды. Оған Ахметовтың шын жүректен өкініш білдіріп, 2,5 миллиард теңге көлемінде шығынды өтеуі түрткі болды.
2017 жылдың қыркүйегінде бұрынғы премьер-министрдің бас бостандығынан айыру жазасы тұрғылықты жерінде бостандығын шектеу жазасына ауыстырылды.
Ахметов колониядан шығып бара жатып: «Назар аударғандарыңыз үшін баршаңызға рақмет. Мен үйге барамын, демаламын», – деді.
Кейін Серік Ахметов өзін шартты түрде мерзімінен бұрын босатуды сұрап, сотқа өтініш берді, бірақ, өтініш қанағаттандырылмады. 2020 жылдың маусымында сот өтініш берушінің өз өтінішін кері қайтарып алуына байланысты шартты түрде мерзімінен бұрын босату туралы қайта жолданған өтінішті қараусыз қайтарды.
Серік Ахметов әр жылдары Теміртау қаласының әкімі, Қарағанды облысының әкімі, Көлік және коммуникация министрі, Қорғаныс министрі болды.