Мәжіліс Спикері Нұрлан Нығматулиннің төрағалық етуімен Түркі әлемінің рухани астанасы Түркістан қаласында «Түркі парламентаралық ынтымақтастығының көкжиегі» атты ТүркПА-ның X мерейтойлық пленарлық отырысы өтті.
Іс-шара барысында Түркітілдес елдер парламенттік Ассамблеясы кеңесінің отырысы өтіп, онда Қазақстан ТүркПА-ға төрағалық етуді Әзербайжаннан қабылдап алды. Н.Нығматулин халықаралық ұйымға төрағалық біздің ел үшін үлкен мәртебе және зор жауапкершілік екенін айтып, әзербайжан халқына шын жүректен алғысын білдірді. – Түркі кеңесінің отырысында Елбасы, ТүркПА-ның негізін қалаушы, Түркі кеңесінің Құрметті Төрағасы Нұрсұлтан Назарбаев осы кеңесті толықтай халықаралық ұйымға өзгерту туралы бастама көтерген болатын, - деген Мәжіліс басшысы биылғы қарашада Стамбұлда өтетін Түркі кеңесінің кезекті отырысында мемлекет басшылары тиісті шешім қабылдайды деп күтіліп отырғанын ескерте келе, егер сондай шешім қабылданса, Ассамблеяның атауын «Түркі мемлекеттерінің Парламенттік Ассамблеясы» деп өзгертуді ұсынатынын жеткізді. – Алдағы бір жыл ішінде біз қалыптасқан мұрагерлікті сақтай отырып, елдеріміздің арасындағы байланысты одан әрі тереңдету, парламентаралық ынтымақтастықты нығайту, ассамблея аясын кеңейту және халықаралық беделін арттыру жолында бірлесе еңбек ететін боламыз, – деді Нұрлан Нығматулин. ТүркПА-ның X пленарлық отырысына Елбасы Нұрсұлтан Назарбаев пен Мемлекет басшысы Қасым-Жомарт Тоқаев арнайы құттықтаухат жолдады. Оны Мәжіліс Төрағасы оқып берді. Сонымен қатар ол Қазақстанның ТүркПА-ға төрағалығының негізгі бағыттарына тоқталды. Нұрлан Зайроллаұлы ассамблея қызметінің алдағы негізгі бағыттары түркі әлемінің ұзақмерзімді мақсаттарын іске асыруға серпін беретін «Түркі келешегі–2040» стратегиялық құжатын әзірлеу екенін айтты. – Біз Кеңесте ТүркПА-ның үлгілі заңдары туралы ережесін қабылдадық. Сонымен бірге ТүркПА заң жобалау қызметінің 2022-2027 жылдарға арналған бағдарламасын әзірлейтін боламыз. Жаңа цифрлық технологиялардың дамуы ақпараттық қауіпсіздікке көңіл бөлуді қажет етеді. Сондықтан біз «Киберқауіпсіздік туралы» модельдік заң қабылдауды ұсынамыз, – деді палата спикері. Н.Нығматулиннің айтуынша, тағы бір негізгі бағыт – халықаралық қатынастар. Отырыста қауіпсіздік мәселелеріне ерекше назар аударылды. Әсіресе, Ауғанстандағы қазіргі жағдай алаңдатып отыр. БҰҰ-ның Ауғанстанға көмек көрсету миссиясының қызметкерлері уақытша Алматыға көшірілді. Мәжіліс Төрағасы Елбасы бастамасымен биыл «Түркістан» телеарнасы ашылғанын, үздік техникамен жабдықталғанын айтты: «Түркістан бүкіл Түркі әлемінің «рухани Астанасы» болғандықтан, телеарнадан түркі мемлекеттеріне ортақ арна жасауды ұсынамын», – деді ол. Түркі елдерінің құрылтайы аясында қорытынды құжат – «Түркістан декларациясы» қабылданды. Н.Нығматулиннің айтуынша, Түркістан декларациясы ТүркПА-ның негізін қалаушы, Елбасы Н.Назарбаевтың теңдессіз жоғары рөлін бағалап, тарихи үлесін ерекше көрсетті. Келесі сессия 2022 жылы Қырғыз Республикасында өтеді.Елдос СЕНБАЙ