Ақмола облысында 87 мектептің 133 сыныбы қашықтан оқытуға ауыстырылды
Ақмола облысында 87 мектептің 133 сыныбы қашықтан оқытуға ауыстырылды
Ақмола облысында жыл басынан бері мектеп оқушылары арасында 481 бала коронавирус инфекциясын жұқтырды. Олардың ішінде 165 факті жаңа оқу жылы басталғаннан бері болған. Бұл туралы облыстың бас санитар дәрігері Айнагүл Мусина мәлім етті, – деп хабарлайды Aikyn.kz порталының тілшісі. Ведомствоның мәліметінше, тек соңғы тәулікте ғана 23 мектеп оқушысының індет жұқтырғаны анықталған.
«Облыстың 87 оқу орнында коронавирус инфекциясы тіркелгендіктен, 133 сыныптың оқушылары қашықтан оқытуға жіберілді», – дейді Айнагүл Мусина.
Спикердің айтуынша, арнайы орта білім беретін оқу орындарында 65 дерек тіркеліп, оның ішінде 44 бала офлайн оқыса, 21-і онлайн оқығаны анықталған.
«Індетті ең көп жұқтыру оқиғалары Щучинск қаласында анықталды. Тек Щучинск жоғары техникалық колледжінде 11, Көкшетау қаласында 9 студент ауырғаны анықталды. Бұлардың барлығы оффлайн форматта оқыған. Жоғары оқу орындары арасында 12 факті, оның ішінде екеуі Шоқан Уәлиханов атындағы университетте тіркелді», – деп толықтырды бас санитар дәрігер.
Оқушылар мен студенттер арасындағы ауру жұқтыру фактілері бойынша кешенді эпидемияға қарсы шаралар жүргізіліп, жақын байланыста болған тұлғалар қашықтан оқыту формасына ауыстырылған. Барлық жақын қатынаста болғандар карантинге жіберілді.

Абзал АЛПЫСБАЙҰЛЫ, Ақмола облысы