Елімізде екпе салғызудағы көзбояушылықпен күрес ары қарай қарқын алды. Түркістан облысының полицейлері жалған вакцина құжатын жасады деген күдікпен 2 аурухана қызметкерін ұстады, – деп хабарлайды Polisia.kz.
Қазығұрт ауданы полициясының кезекші бөліміне белгісіз азаматтан анонимді хат түсті. Онда Қазығұрт ауданында үш бірдей тұрғынның жалған вакцина құжатын жасатқаны туралы айтылған. Хабар түсісімен полиция қызметкерлері тексеруге кіріседі. Жедел-іздестіру іс-шараларының барысында қызметтік мүмкіндігін негізсіз пайдалану арқылы вакцинация паспорттарын қолдан жасаумен және өткізумен айналысқан Қазығұрт аудандық ауруханасының екі қызметкері әшкереленіп, екі әйел де полиция бөліміне жеткізілді. Қазір бұл жайт Қылмыстық кодекстің 385-бабы (Жалған құжаттарды, мөртабандарды, мөрлердi, бланкілерді, мемлекеттiк пошта төлемі белгілерін, мемлекеттiк наградаларды қолдан жасау, дайындау немесе өткiзу) бойынша сотқа дейінгі тергеу амалдары жүргізіліп жатыр. Аудан полицейлері анықтағандай, медицина қызметкерлері үш тұрғынға жалған құжат жасаған. Оқиғаның толық мән-жайы анықталуда. Түркістан облысының полицейлері тұрғындарға заңға қайшы келетін әрекеттер үшін қылмыстық жауапкершілік қарастырылғанын еске салады.Е.ЕРДЕНОВ