1 қазан күні елордада «Қазмедиа орталығының» Киноконцерт залында Қазақ радиосының 100 жылдығына арналған салтанатты жиын өтті.
Іс-шара тиісті карантин талаптарына сай және телетүсірілім форматында өрбіді. Жиында Елбасы Н.Назарбаевтың және Мемлекет басшысы Қ.Тоқаевтың құттықтау хаты оқылды. Айта кету керек, биыл Мемлекет басшысының бастамасымен Қазақ радиосы құрылған 1 қазан «Радио күні» датасы ретінде белгіленіп, бүгін алғаш рет атап өтіліп жатыр. Қазақ радиосы ұжымын құттықтау хатында Елбасы халқымыздың талайлы тарихы мен шежіресі эфирде қамтылып, аумалы-төкпелі кезеңдерде ел өміріндегі маңызды оқиғалар жұртшылыққа жедел жеткізілгенін ерекше атап өтті. «Бір ғасыр ішінде осы қарашаңырақта еңбек еткен майталман журналистер мен көрнекті қайраткерлер көпшіліктің ыстық ықыласына бөленіп, өшпес із қалдырды. Әуе толқынында көптеген бағдарламалар төл мәдениетімізді насихаттауға, ана тілімізді дәріптеуге, ұлт санасын жаңғыртуға өлшеусіз үлес қосып, қазақ руханиятының алтын қорын қалыптастырды» делінген Елбасы құттықтауында. Құттықтауды Елбасы кеңесшісі – баспасөз хатшысы А.Үкібай оқып берді. Қазақстан Республикасының Президенті Қ.Тоқаевтың құттықтауында «Қазақ радиосының жылнамасы – халқымыздың 100 жылда жүріп өткен жолының айнасы. Радио алғаш құрылған күннен бастап ел мүддесіне қызмет етіп келеді. Қазір де Тәуелсіздіктің қадір-қасиеті мен ұлттық құндылықтарды жастардың санасына сіңіруге сүбелі үлес қосып жатыр. Тәуелсіздігіміздің 30 жылдығына тұспа-тұс келген бүгінгі мерейтойдың орны бөлек. Биылдан бастап 1 қазан «Радио күні» болып бекітілді. Мұның өзі бұл саланың ақпарат айдынындағы рөлі ерекше екенін аңғартады» делінген. Мемлекет басшысының құттықтауын вице-премьер Е.Тоғжанов оқып берді. Сондай-ақ жиында Ақпарат және қоғамдық даму министрі А.Балаева Қазақ радиосын мерейтойымен құттықтай келе, оның таралым аумағын кеңейту мақсатында шекара маңындағы аумақтарда радиохабар таратудың мемлекеттік желісін дамыту жөніндегі 2022-2025 жылдарға арналған жол картасы қабылданып, конкурс негізінде Қазақ радиосына 107 радиожиілік спектрі бөлінгенін айтты. Оның нақты мысалы ретінде жиын барысында ШҚО, Тарбағатай ауданы, Көкжыра елді мекенінде жаңа радиожиілік іске қосылды. Іс-шара барысында Нұр-Сұлтан және Алматы қалаларындағы Қазақ радиосының студияларынан сахнаға тікелей қосылым жасалды. Мерекелік кеште бейнематериалдар мен музыкалық нөмірлер қойылды. Қазақ радиосының «Алтын қорында» сақталған Б.Момышұлы, Қ.Қайсенов, М.Әуезов, А.Жұбановтың үнтаспаға жазылған сұхбаттарынан үзінділер берілді.А.ЖОЛДАС