Шымкент қаласы бойынша «Nur Otan» партиясының «Өзгерістер жолы: әркімге лайықты өмір!» сайлауалды бағдарламасын іске асыру бойынша партияның Саяси кеңесі бюросында қалалық партия филиалы жанынан 11 қоғамдық кеңес құрылған-ды. Соның бірі – «Ұлт денсаулығы мәселелері жөніндегі» өңірлік Қоғамдық кеңесі. Аталған өңірлік кеңеске Есенбек Серкебаев төрағалық етеді. Құрамына праймериз жеңімпаздары, дәрігерлер, қалалық мәслихат депутаттары, партиялық кадрлық резерв өкілдері, азаматтық қоғам және БАҚ өкілдері енген кеңес бүгінде белсенді жұмыс атқарып келеді. Біз қоғамдық кеңес төрағасы Есенбек Серкебаевпен тілдесіп, атқарылған жұмыстарды сұрағанбыз.
Сыннан қорытынды шыққан
«Ұлт денсаулығы мәселелері жөніндегі» өңірлік Қоғамдық кеңес мүшелерінің араласуымен медицина саласындағы бірқатар түйткілді мәселенің шешімі табылып, кейбір кемшіліктер дер кезінде ретке келтірілді», – дейді кеңес төрағасы. Қоғамдық кеңес мүшелері мамыр айының соңында күрделі жөндеу жұмыстарын жүргізген бірқатар медицина мекемесіне барып, зерделеу жасаған. Бақылау барысында Шымкент қаласындағы №1 қалалық емхана мен «Ана мен бала» оңалту орталығы және №2 қалалық ауруханаларында жүргізілген күрделі жөндеу жұмыстары барысында медициналық, техникалық жабдықталуымен танысу кезінде бірқатар олқылық анықталған. «Ана мен бала» оңалту орталығына барғанымызда науқастар үшін екі жансақтау бөлмесі бар екеніне қарамастан, сырттан келетін медициналық газдың орналасқан жері мен тарататын мыс түтікше құбырлары күрделі жөндеуден өтпегеніне және қауіпсіздік талаптарына сай келмейтініне көз жеткіздік. Бұл дегеніміз, медициналық газбен қамтамасыз ету күрделі жөндеуден өтпеген, яғни жоба-сметалық құжаттамаға енгізілмеген деген сөз. Орталықтың бас дәрігері Бақытжан Шәкеновке аталған кемшілік туралы ескерткенімізде басын изеуден басқа жауап бере алмады. Орталықта бейнекамералар саны да жеткіліксіз болып шықты. Алайда осы ескертулерден соң 4 айдан кейін аталған орталыққа барып, кемшіліктердің орны толғанын көріп қуандық. Сыннан қорытынды шығарылып, медициналық газ құбырлары қоршалып, техникалық қауіпсіздік шаралары талапқа сай жасақталыпты. Ал №1 қалалық емхананы аралау барысында аталған емханада жүргізілген күрделі жөндеу жұмыстарының сапасы кеңес мүшелерінің көңілінен шыққанымен, екпе салатын бөлменің кіреберісіне қосымша бейнебақылау камераларын орнату жөнінде ұсыныс айтылды», – дейді Есенбек Серкебаев.Күрделі жөндеуге 3,8 млрд теңге бөлінген
Ал үшінші мегаполистегі ең үлкен және стратегиялық медициналық нысан болып саналатындықтан, №2 қалалық аурухананың құрылысы (фосфор ауруханасы аталып кеткен) кеңес мүшелерінің жіті бақылауына алыныпты. Кеңес төрағасының айтуынша, күрделі жөндеу жұмыстары үшін қыруар қаржы бөлінген №2 қалалық аурухананың құрылысында кемшілік көп. «Ауруханада күрделі жөндеу жұмыстары жүргізілгеніне қарамастан, нысанның айналасы толық абаттандырылмаған және көгалдандырылмаған. Жалпы, мекеме ғимараттары мен айналасын визуалды қарау барысында сапасыз және толық емес жұмыстар жасалғаны байқалып тұрды. Медицина мекемесінің сыртқы қоршаулары және кейбір ғимараттары да толық күрделі жөндеу көрмеген. Аурухананың аумағында орналасқан трансформатор желісі де кеңес мүшелерінің көңілінен шықпады. Негізгі қақпадан кіреберістегі модуль ғимараты мүлде күрделі жөндеу көрмеген десе де болады. Ал кір жуу ғимараты жөнделгенімен, мұнда қажетті өндірістік машиналарды көрмедік. Соған қарағанда жоба-сметалық құжаттаманың дұрыс дайындалмағаны байқалды. Сонымен қатар аурухананың жаңа келген науқастарды қабылдау бөлімінде және емхананың екпе салу бөлмелерінің маңында бақылау бейнекамералары тіптен жоқ. Бас дәрігердің уақытша міндетін атқарушы Қанат Тумановтың аталған кемшіліктер жөнінде хабарсыз екені байқалды. Себебі ол кеңес мүшелері қойған сұрақтарға мардымды жауап бере алмай қатты қиналды», –дейді кеңес төрағасы. Жалпы, осынау ауруханада жыл басынан бері түсініксіз жайттар болғаны рас. Аталған аурухананы күрделі жөндеу үшін бюджеттен 3,8 млрд теңге қаралыпты. Мамандар бұл қаржыға типтік үлгідегі 2 аурухана салуға болатынын меңзеп отыр. Одан бөлек, күрделі жөндеу жұмыстары аяқталған соң бұрынғы бас дәрігер қабылдау актісіне қол қоймай жұмыстан шығып кетеді. Ал одан кейін келген Мыңжылқы Бердіқожаев құрылыстың басы-қасында болмаған соң қол қоюдан бас тартқан. Сөйтіп, ол құрылыс жұмыстарының мәселесі әбден біткенше бас дәрігерліктен шеттеле тұрғысы келеді. Әйтеуір, түсініксіз жайттар... Бұл туралы қоғамда үлкен пікірталас тудырған мәселе болғанын да атап өтті кеңес төрағасы. №2 қалалық ауруханада «қос басшылық немесе екі бас дәрігер» деген төңіректе шу шыққан. Бұл жағдай бойынша шұғыл түрде «Nur Otan» партиясының қоғамдық кеңесінің кезектен тыс көшпелі отырысы өткізіліп, партия тарапынан жіті бақылауға алынғанын да жеткізді. Одан бөлек, күрделі жөндеу жұмыстары аяқталып, 7 сәуірде тараптар пайдалануға қабылдау актісіне қол қояды. Ал 14 сәуірде мердігер «Югстройсервис» ЖШС құрылыс компаниясы тарапынан тізімге сәйкес реттеу кепілдеме хаты жазылады және оның орындалу мерзімі көрсетілмейді. Алайда бұл кепілдеме хатта аурухананың толық жөндеу көрмеген сыртқы қоршаулары, модуль ғимараты, трансформатор желісі, аурухананың айналасын көгалдандыру және абаттандыру жайлы бірде-бір сөз жоқ болып шыққан. Жуырда кеңес мүшелері жоғарыдағы айтылған кемшіліктердің орындалуын бақылау мақсатында №2 қалалық ауруханаға қайта барды. Мұнда бірқатар сын-ескертпе ретке келгенімен, нысанның айналасы толық абаттандырылмағаны, айнала қоршауларының да әлі ауыстырылмағаны байқалған. Сонымен бірге кіреберістегі модуль ғимараты мүлде жөндеу көрмепті. Кеңес төрағасы кемшіліктердің толық ретке келмеуіне байланысты аталған мәселе енді Партиялық бақылау комиссиясының қарауына ұсынылатынын атап өтті.Дәрігерлердің базынасы бар
Қоғамдық кеңес қол жеткізген нәтиженің бірі, көшпелі отырыс кезінде екпе салу пункттерінде бақылау бейнекамераларының жоқтығы айтылып, сынға алынып, басқармаға ұсыныс жолданған болатын. Нәтижесінде, қалалық Денсаулық сақтау басқармасының басшысы Бақытжан Позилов елімізде алғаш болып Шымкенттегі егу бекеттеріне бейнебақылау камералары орнатылғаны туралы сүйінші хабар таратты. Сонымен қатар қоғамдық кеңес мүшелері ақ халаттылармен пікірлесу барысында олардың да мәселелері қордаланып қалғанына көз жеткізген. Жалпы ақпарат беруден бастап, үгіттеуді, тұрғындардың үйін аралауды, мобильді топтарды көлікпен қамтамасыз етуді емханалардың өзіне жүктеп тастағанын жеткізген. Осындай келеңсіздіктерден соң кадрлардың жұмыстан бас тартуы белең алған. Емдейтін дәрігер үгіт жүргізіп көшеде жүреді де, одан қайтып келіп түн ортасына дейін қағаз толтыратындарын айтады. Медицина қызметкерлері қалада халыққа саламатты өмір салтын насихаттаумен айналысуы тиіс саламатты өмір салтын қалыптастыру орталығы дейтін мекеменің пандемия басталғалы бері үні шықпағанын айтып, күйінген. «Неге осы мекеме насихаттаумен айналыспайды? Тікелей жұмысы емес пе?» деген шағымдарын да жеткізген кеңес мүшелеріне. Осы мәселе бойынша басқармаға ұсыныс жолданыпты. Кеңес мүшелері денсаулық сақтау саласындағы барлық құрылым бүгінгідей сын сағатта үйлесімді жұмыс атқаруы тиіс, денсаулық күтімін сақтауда халық арасында нәтижелі түсіндіру жұмыстарын жүргізудің маңызы зор дейді.Назгүл НАЗАРБЕК, Шымкент қаласы