Қазақстан түрмелерінде отырған тұтқындардың 97 пайызы коронавирусқа қарсы вакцина алыпты. Бұл жайында Ішкі істер министрлігінде өткен брифингте мәлім болды.
Пандемия басталғаннан бері түрмеде 214 адам коронавируспен ауырған. Ведомство түзеу мекемелерінде ауруды таратпау үшін барлық қажетті шара сақталатынын атап өтті. Барлық қызметкер иммундаудан өткен екен. Сондай-ақ осы кезге дейін ел түрмелерінде өкпе ауруларына шалдығатындар көп екені айтылатын. Осы орайда министрлік бас бостандығынан айырылғандар арасында өкпе дертіне шалдығу 86 пайызға азайғанын хабарлады. «Бұл – өте жақсы көрсеткіш», – деді жауапты ведомство мамандары. Пенитенциарлық медицина туберкулезді емдеуде тиімділігін көрсеткен. Яғни, сотталғандар үшін заманауи құрылғыда тексерілу, диагностика және емдеу әдістері қолжетімді болды. Туберкулезді ерте анықтау және уақытылы емдеу мақсатында қылмыстық атқару жүйесі мекемелеріне келіп түсетін барлық адам міндетті түрде флюорографиялық тексеруден өтеді. Жылына 2 рет медициналық тексеріс жүруі тиіс. 2019 жылғы 1 сәуір мен 2020 жылғы 1 сәуір аралығында Алматы және Қарағанды облыстарының түзету мекемелерінде пилоттық жоба енгізілген болатын. Нәтижесінде, сотталушыларға медициналық көмек көрсету жақсарған.М.ТӨЛЕУ