Солтүстік Қазақстан облысына газ жетпей жатыр. Қазір кей жанармай құю бекеттерінде автогаз талонмен беріледі. Оның үстіне, литрі 110 теңгеге дейін көтеріліп кеткен. Ал тұрғындар биліктен мәселені шешуді сұрап отыр.
Көлігі көгілдір отынмен жүретін тұрғындар жанармай құю бекеттерін жағалап жүр. Бірақ көбі газ таппай әлек, бар болса да талонмен беріледі екен. Өңір халқы осы кезге дейін газдан еш қиындық көрмегенін айтады. Әуелі газ тапшы бола бастаған, көп ұзамай баға бірден 30 теңгеге қымбаттаған. Осыған қарап жағдай қолдан жасалған ба деген күмән бар. Негізі, кәсіпкерлер көгілдір отынды электронды аукционнан сатып алады екен. Қазір Солтүстік Қазақстан, Қарағанды, Ақмола, Қостанай облыстары мен Нұр-Сұлтан қаласы бір жүйеге енгізілген. «Ашық сатылым күнде өтеді. Газды кім бірінші болса, сол алады», – дейді шенеуніктер. – Қазір 8 аккредиттелген ұйымның төртеуінде газ еркін сатылымда. Орташа бағалары 85-95 теңге аралығында. Қалғандары талонмен босатып жатыр. Бұл көгілдір отынды электронды аукционнан ала алмай қалған компаниялар. Газдың бағасы электронды аукционда да қымбаттады. Соңғы рет тоннасы 102 мың теңгеге сатылды. Бұрын 69 мыңнан болған. Қазір облыста 500 тонна ғана газ қалды, – дейді Энергетика және ТҮКШ басқармасының бөлім басшысы Ерлан Қайырбеков. Осыған байланысты жергілікті билік өкілдері Энергетика министрлігінен кәсіпкерлер сатып алғаннан бөлек қосымша 1,5 мың тонна көгілдір отынға тапсырыс беріп отырғанға ұқсайды.М.ТӨЛЕУ