Елорда аумағында 3 есірткі зертханасы жойылып, есірткі сатқан 106 адам сотталды. Сондай-ақ есірткі өсімдігін өсірудің 2 фактісі тіркелді.
Өкінішке қарай, бүгінде есірткі қылмысы белең алып тұр. Оны өткізу «байланыссыз» түрге көшкен. Яғни, сатушы мен алушы бір-бірін көрмейді. Есірткі саудасы қаланың кез келген нүктесіне жасырып кету арқылы жүзеге асырылады. Полицияның мұндай адамдарды анықтау және жауапкершілікке тарту үшін барлық қажетті іс-шараларды белсенді түрде жүргізгенінің арқасында жыл басынан бері елорда аумағында тек есірткі сату фактісімен 106 адам қылмыстық жауапкершілікке тартылған. «Одан бөлек, жыл басынан бері елорда аумағында синтетикалық есірткі әзірлеумен айналысатын 3 зертхана жұмысы әшкереленді. Синтетикалық есірткі әзірлеушілермен қатар үй жағдайында психикалық белсенді заттары бар өсімдік өсіретін адамдар да бар. Ондай есірткі өсімдігін өсірудің 2 фактісі тіркелді. Қазір тергеу жүргізіліп жатыр», – дейді Нұр-Сұлтан қалалық Полиция департаменті есірткі қылмысына қарсы іс-қимыл бөлімінің бастығы Сергей Ильиных. Бөлім бастығының айтуынша, қазір есірткі заттарының заңсыз жарнамасы түрлі формаға бейімделген. Олардың қатарында граффитти, сурет, барлық баспа өнімдері, үнпарақ, жапсырма бар. Тіпті, бильбордтарға QR код таңбалау арқылы заңсыз жарнаманы тарату фактісі де тіркеліп отыр. Полиция департаменті мұндай жарнамаларды анықтау бойынша оқыту семинарларын өткізуде. Коммуналдық қызмет өкілдерімен кездесіп, мұндай жарнамаларды қалай анықтау керегін, неге назар аудару қажетін түсіндіруде. Үкіметтік емес ұйымдарды, корпоративтік қорларды, волонтерлерді жұмылдырып, рейд жүргізуде.Н.СӘРСЕНҒАЛИҰЛЫ