Бүгінде Тараз қаласында «сақалды» құрылыстан көз сүрінеді. Қала әкімдігінің тексерісінен кейін шаһарда мұндай 35 нысан анықталып отыр. Оның 23-і сотқа жолданған. Алайда нысан иелерін сотқа беру арқылы «сақалды» құрылыс мәселесі толықтай шешіле ме? Заң органдарына жүгінбей тұрып жергілікті билік олардың жағдайын білді ме? Әкімдіктің мұндай әрекетіне нысан иелері не дейді?
11 нысан иесі құрылысты қайта қолға алған
Тараз қаласы әкімдігінің сәулет және қала құрылысы бөлімінің басшысы Алмас Бобеевтің сөзіне сүйенсек, қала әкімінің биыл 5 сәуірдегі №14 хаттамалық тапсырмасына сәйкес, тексеріс жұмысы басталып, 35 нысан иесіне түсіндіру жұмысы жүргізіліпті. Нәтижесінде, бірқатар нысан қожайыны мәмілеге келіп, құрылысты аяқтауға уәде берген. – Рысбек батыр көшесіндегі №5 мекенжайда орналасқан нысанның иесі Д.Қосалиева құрылыс-монтаж жұмыстарын аяқтап, пайдалануға қабылдау актісін рәсімдеді. Қазір ол нысанды сауда кешені ретінде пайдалануда. Одан бөлек, түсіндіру жұмыстарын жүргізгеннен кейін 11 нысан қожайыны құрылыс-монтаж жұмысын қайта қолға алды. Ал қалған 23 нысанның қожайынына сот арқылы шара қолдану үшін тізімдері «Тараз қаласы әкімі аппаратының құқық қорғау органдарымен жұмыс және құқықтық қамтамасыз ету бөлімшесіне» жолданып отыр. Қазір олардың ісі сотқа жолданды, – дейді бөлім басшысы.Мәселесі сотта қаралатындар
Мәселесі сотта қаралатындардың тізіміне келсек, олардың қатарында халық қалаулыларынан бастап, қарапайым шаруаға дейін бар. Сот үкімі шықпағаннан кейін олардың аты-жөні мен нысаны туралы айта алмаймыз. Алайда Сүлейменов көшесі «Атшабар» шағынауданында орналасқан Халықаралық Тараз инновациялық институтына тиесілі нысанның иесі құрылысты толықтай аяқтайтыны туралы кепілхат бергендіктен, оларға қатысты іс тоқтатылған. Сондай-ақ Қ.Тұрысов көшесі №5 «В» мекенжайдағы көпқабатты ғимарат құрылысын «Реактивті фосфорлы қосындылар» ЖШС бітіруге уәде еткендіктен талап-арыз қайтарып алынған. Бұдан бөлек, Тараз қаласы «Алатау» ықшамауданы №22 «А» және Абай даңғылы №12 «А» жер телімдерінің иелері қайтыс болуына байланысты сотта қаралмаған.Нысан иелері не дейді?
Тараз қаласында болған бұл жағдайға қатысты нысан иелері не дейді? – Барлық жұмыс қаржыға келіп тіреледі. Кондитерлік фирмамның табысы пандемияға байланысты төмендеп кетті. Ал құрылыс материалдары күн санап өсіп барады. Егер жағдай қалыпты болғанда демалыс орнымның құрылысын жоспарға сай бітірер едім. Десе де, биыл құрылысты бітіруге барымызды салып жатырмыз. Себебі ісің сотта қаралып жатқаны кімге жақсы дейсің?, – дейді «Ширинкомшарг» ЖШС-ның шаруашылық жөніндегі орынбасары Мұхтар Бекбергенов. Ал «За линией» алқабы Пірманов көшесі №67 мекенжайдағы дүкен, шаштараз, дәріхана, бильярд және техникалық қызмет көрсету орталығының меншік иесі Ерлан Өмірбекұлы биыл құрылысты аяқтай алмайтынын ашып айтты. – Мұндағы құрылыс жұмыстарын банктен несие алып бастағанбыз. Алайда құрылыс материалдарының қымбаттап кетуінен жоспарлаған ақшамыз жетпей қалды. Енді келер жылы банк алдындағы берешегімізді төлеп, тағы несие алып, құрылысты жалғастыру ойымызда бар. Бізде басқа амал болмай тұр. Құрылыс нысандары анамыздың атында болғандықтан, ол кісі қала әкімдігіне барып, бар жағдайды түсіндірген. Қолдау білдіру туралы өтінішін де қалдырды. Егер жергілікті билік тарапынан бір демеу болса, «сақалды» құрылыс иесі атанып отырмас едік, – дейді қала тұрғыны.Бұл да бір мәселе
Қалада бүгінде «қызыл сызық» үстіне салынған нысандарды сүру жұмыстары қарқын алуда. Әкімдік берген ақпаратқа сүйенсек, шаһар бойынша 41 дүңгіршек болса, соның 12-і ғана заңды салынған. Қалған дүңгіршектің қазірге дейін 17-і сүрілсе, қалған 12-не ескерту түрінде хабарлама жолданған. Бұл мәселеге қатысты Тараз қалалық мәслихаттың хатшысы Батырбек Құлекеевтің өз айтар ойы бар. – Мұндай мәселеде аса ұқыптылық керек. Әрине, бәрі заң шеңберінде, қала көркі үшін жасалып жатқаны түсінікті. Алайда қала әкімдігіне қарасты бөлімдер «қызыл сызық» үстіндегі нысандардың әрқайсысын зерделеп барып, басшылыққа ақпарат бергені жөн. Олай дейтінім, кезінде сол нысандардың құрылысына жер беріп, сызбасын дайындаған – сол бөлімдер. Сондықтан шаш ал деген екен деп, бас алуға болмайды, – дейді Батырбек Әбдірәсілұлы. Биыл каналдардың бойына салынған нысандарға қатысты да мәселе көп. Қала әкімдігінің жер қатынастары бөлімінің тексеруінің нәтижесінде кәсіпкерлік бағыттағы алты нысанның заңсыз орналасқаны белгілі болды. Бұл фактілер бойынша қала әкімдігі тарапынан облыстың мамандандырылған ауданаралық экономикалық сотына талап-арыз жолданған.P.S.
Әрине, байыбына бармай жатып, байбалам салудан аулақпыз. Алайда аталған нысандардың барлығының артында адам тағдыры мен күнделікті күнкөрісі тұр. Сондықтан нысандарды сүрмес бұрын, «сол ғимараттардың салынуына кезінде кім рұқсат берді?» деген сауалға үңілу керек секілді. Сондай-ақ әлемдік пандемия жағдайында қаржылық қиындықтарға тап болған «сақалды» құрылыс иелеріне де түсінік танытқан абзал. Себебі қаржысы жеткілікті болса, кім құрылысының тоқтап тұрғанын қалайды...
Саятхан САТЫЛҒАН, Жамбыл облысы