Қарағанды облысында Индустрияландыру картасына 16 мыңнан астам жұмыс орнын құруды қарастыратын жалпы сомасы 1,2 трлн теңгеге 134 жоба енгізілді. Олардың біразы іске қосылды. Жаңа өндірістің арқасында өңірде өнеркәсіп өнімдерін өндіру 5 есе өсті.
Бағдарламаны іске асыру барысы туралы онлайн режимде өткен аппараттық кеңесте айтылды. – Индустрияландыру жылдарында 2010 жылдан бастап Индустрияландыру картасы аясында облыста 94 жоба іске асырылды. Инвестицияның жалпы сомасы 387,3 млрд теңгені құрады. Кәсіпорында 8 мыңға жуық жұмыс орны ашылды. Жобаларды іске асыру өндіріс көлемін 5 есе, еңбек өнімділігін 1,7 есеге арттыруға мүмкіндік берді, – деп баяндады Өнеркәсіп және индустриялық-инновациялық даму басқармасының басшысы Мұрат Қыдырғанбеков. Өңір кәсіпорындары бұған дейін шетелден сатып алуға тура келген өнімді шығаруды игерді. Үшінші бесжылдықта 2020 жылдан 2025 жылға дейін 43 инвестициялық жобаны іске асыру жоспарланған. Өткен жылы үш ірі жоба іске қосылды: Теміртауда «Линде Газ Қазақстан» ЖШС екінші кезегі енгізілді, аталған жоба Елбасының «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында қамтылған индустрияландыру бағдарламасын табысты іске қосу аясында жүзеге асырылды. Айта кету керек, «АрселорМиттал Теміртау» ЖШС мен еншілес компания ТМД-дағы аса ірі ауа бөлгіш құрылғының құрылысына инвестиция салған «Линде Газ Қазақстан» ЖШС кәсіпорны, аймағымыздың инвестициялық климатын жақсарту және инвестицияларды жұмылдыру бойынша жобаларды жүзеге асыруда. Linde тобы – әлемдегі ең ірі техникалық газ тасымалдаушылардың бірі. Инвестициялар шамамен 70 млн еуроны құрайды. Компания өнімі 100-ден астам елде қолданылады. Аталған жобаны іске асыру туралы келісім индустрияны дамытуға арналған іс-шаралар аясында жүзеге асырылған. Сонымен қатар Қарағандыда Qaz Carbon ЖШС құю өндірісі жаңғыртылды. Бүгінде Qaz Carbon ЖШС сағатына 300 тоннаға дейін жоғары сыныпты көмір концентратын өндіреді. Кәсіпорын шикізаттың жалпы тау-кен массасынан пайдалы қазбаны барынша шығаруды жүзеге асыруға мүмкіндік беретін бірегей технологияның нәтижесінде кіріс күлі 15%-дан өзіндік күлі 2-3%-ға дейінгі көмірді байыта алады. Бүкіл процесс химиялық реагенттерді және суды тазарту бассейндері үшін үлкен алаңдарды қолданбастан жабық циклде жүреді. Бұл өз кезегінде қоршаған ортаға кері әсерді төмендетіп, өндіріс уақыты мен шығындарын азайтады, нәтижесінде дайын өнімнің өзіндік құнына әсер етеді. Жобаның жалпы құны, соның ішінде байыту фабрикасын салуға және іске қосуға, сондай-ақ қолданыстағы құю өндірісін жаңғыртуға байланысты құны 12 млрд теңгені, Қазақстанның даму банкінің қатысуы 9 млрд теңгені, қалған қаражат Qaz Carbon ЖШС-ның меншікті қатысуын құрады. Шикізаттың негізгі жеткізушілері – жергілікті көмір кәсіпорындары. Дайын өнімнің негізгі тұтынушысы – YDD Corporation ЖШС Қарағанды ферроқорытпа зауыты. Байыту фабрикасы өңірдің экспорттық географиясын белсенді түрде кеңейтуді жоспарлап отыр, яғни Қарағанды көмір концентратының едәуір бөлігі экспортқа жіберіледі. Саран қаласында Yutong әлемдік брендімен бірлесіп, автобус зауыты іске қосылды. Жобаның құны шамамен 23 млрд теңгені құрайды, мыңнан астам жаңа жұмыс орны құрылады. Жылдық жобалық қуаты – 1 200 автобус пен электробус, сондай-ақ 500 бірлік арнайы техника. Зауытта бірнеше өндірістік циклды: дәнекерлеуді, бояуды, құрауыш шығаруды, зерттеу орталығын, сондай-ақ техниканы сынау және тексеруге арналған тректі іске қосу қарастырылған. Yutong маркалы автобустар барлық континентте 30-дан астам елде пайдаланылады. Техника қоғамдық тасымалдау саласындағы барлық әлемдік сапа стандарттарына сәйкес келеді. Автобустар мүмкіндігі шектеулі жандарға арналған арнайы пандуспен, орындармен, электронды билет беру және бақылау жүйесімен жабдықталған. 2021 жылға 10 инвестициялық жобаны жүзеге асыру жоспарланған. Алайда пандемияға байланысты объективті себептер бойынша олардың кейбірін кейінге қалдыруға тура келді. Биыл Индустрияландыру картасы бойынша Жәйрем тау-кен байыту комбинаты, агломерациялық фабрикасы бар Сарыарқа ферроқорытпа зауыты сияқты ірі кәсіпорындар іске қосылады. Облыс әкімі Жеңіс Қасымбек инвесторларға қажетті көмек көрсетуді тапсырды. – Осы жылға жоспарланған жобалардың уақытылы іске қосылуын қамтамасыз еткен жөн. Жобалардың толық қуатқа шығуы ерекше бақылауда. Сондай-ақ кәсіпкерлікті қолдау картасына енгізу үшін жаңа инвестициялық жобаларды іздестірумен айналысу керек, – деді өңір басшысы.Әдебиет БЕЛГІБАЙҰЛЫ, Қарағанды облысы