Қазақстандық файтер Мария Агапова Лас-Вегаста аралас жекпе-жектен өткен UFC Fight Night 194 турнирінде жарқын жеңістерінің біріне қол жеткізді.
Жеңіл салмақтағы айқас үш раундқа есептелді. Отандасымыздың қарсыласы «Колумбия патшайымы» лақап атымен танымал колумбиялық Сабина Масо (9-2) болды. Жекпе-жектің бірінші раундында-ақ Мария Масоның мысын басып тастады. Агапова бірінші кезеңде 54 рет дәл соққы жасаса, қарсыласы тек 17 соққысын дөп тигізген. Бірақ кездесудің екінші кезеңінде Сабина шамалы жинақы өнер көрсетті. Дегенмен де бұл раундта да басымдық қазақстандық файтерде болды. Ал үшінші раундта Масо ашық ұрыс тәсіліне көшті. Осы сәтті оңтайлы пайдаланған Мария қарсыласына ауыр соққысын дарытып, колумбиялық спортшыны нокдаунға түсірді. Арада бірнеше секунд өткен кезде отандасымыз қарсыласына қылқындыру әдісін жасады. Масо шарасыз күйде қалды. Осылайша, Агапова аралас жекпе-жектегі оныншы жеңісін тойласа, ал Сабина үшінші жеңілісіне ұшырады.Жалпы, бұл – Агапованың UFC-дегі екінші жеңісі. Ол ірі промоушнде үш жекпе-жек өткізіп үлгерді. Алдымен америкалық Ханна Сайферсті (10-7) жеңді, одан кейін АҚШ-тың басқа өкілі Шейна Добсоннан (4-5) техникалық нокаутпен жеңілген.Осы турнирде Агапова рекордтық гонорарға ие болды. 20 000 доллар кепілдендірілген гонорар болса, тағы 20 000 доллар жеңіс үшін беріліп отыр. Бұдан бөлек, оған үздік өнер көрсеткені үшін 50 000 доллар көлеміндегі бонус табысталды. Демеушілердің ақшалай сыйлығы тағы бар. Оның мөлшері – 4 000 доллар. Осылайша, Агапова 94 000 доллар ұтысқа кенелді. Ал Масо болса 31 000 долларға ие болды. Оның 25 000 доллары нақты сыйақы, 6 000 доллар қосымша сыйақы ретінде берілді. Жекпе-жектен кейінгі сұхбатта Агапова турнирдің алдында қаржылай қиындыққа тап болғанын айтты. Бірақ достарының арқасында бәрі ойдағыдай шешілген. Спортшы бапкерлер мен жолдастарына да алғысын білдіруді ұмытпады. Ал келесі жекпе-жегінде Морозбен жұдырықтасуды қалайтынын ашық жеткізіп, оны жекпе-жекке шақырды. «Марина Морозды жекпе-жекке шақырғым келеді, себебі сұхбаттарында ол мен туралы түрлі қауесеттер айтты. Біріншіден, ол мені көре алмайды, екіншіден, менің спорттық мансабымды құртпақ болды. Оның әңгімесінен соң демеушілерімнен айырылдым. Сол үшін енді Маринаны октагонда сабағым келеді. Бірақ маған басқа қарсыласты қарастыра берген дұрыс шығар, себебі ол менімен жекпе-жекке шығудан қорқады», – деді Агапова. Қазақстандық спортшы негізгі картта өнер көрсетті. Осы ретте айта кетейік, Мария аралас жекпе-жектен әлемдегі ең беделді, танымал спорттық ұйым саналатын UFC тұжырымында әйелдер арасында сынға түсіп жүрген тұңғыш әрі жалғыз қазақстандық файтер. Онымен қоса ол – аралас жекпе-жектен әлем чемпионы (әуесқойлар) атағын жеңіп алған алғашқы қазақстандық спортшы. Бұл жеңіс Агапованың UFC-дегі беделін арттыра түскенін де, гонорарының да өскенін біз жоғарыда атап өттік. Бүгінде UFC-дің кез келген жекпе-жек кеші әлемнің түкпір-түкпірінен жүздеген телеарна арқылы миллиондаған жанкүйер жинайтын ауқымды шараға айналғанын көпшілігі жақсы біледі. Сондықтан мұндай сәтті өнер көрсетсең, ауқымды көлемде табысқа кенелуге де мүмкіндік көп. Сол себептен де шығар, кәсіпқой ережесіз жекпе-жек шеберлері осы ұйым аясында бақ сынауды мақсат тұтады. Біз осы орайда UFC тұжырымында қалай өнер көрсетуге болатынын білу мақсатында панкратионнан әлем чемпионы Жасұлан Әкімжанның пікірін білдік. – UFC-де өнер көрсету үшін ең алдымен спортшы танымал, рейтингі жоғары және жанкүйерлері де көп болуы қажет. Сонымен қатар WSOF, Bellator, ACB сияқты рейтингі жоғары тұжырымдармен келісімшартқа отырып, сегізбұрыш алаңында өзін жақсы қырынан көрсетсе немесе чемпион атанса, өтуге болады. Ал UFC-дің чемпиондық белбеуі тек «мыңнан тұлпар» шыққан марқасқаларға ғана бұйырады. Айтулы ұйымның мұрындық болуымен өтіп жүрген жарыстарда атой салған спортшылардың беделі бүгінде шарықтап тұр, – дейді ол. Бұл ретте Мария Агапованың да Сабина Масоны жеңгеннен кейін ең жеңіл салмақта UFC ұйымының чемпиондық белбеуінен басты үміткерлерінің қатарына бір табан жақындағанын жоққа шығара алмаймыз. Иә, қазір мұндай мәлімдеме жасауға әлі ерте екенін де білеміз. Бірақ тағы екі-үш кездесуден кейін ол мансабындағы басты айқастардың біріне шыға алады. Тек жеңісті жолынан жаңылмағай дейміз.
Абылайхан ЖҰМАШ