Шымкентте жедел-іздестіру шаралары нәтижесінде тәртіп сақшылары 17 пәтер ұрлығына қатысы бар екі күдіктіні ұстады, – деп хабарлайды Polisia.kz.
Портал мәліметінше, барлық жағдайда да күдіктілер бірдей әрекет еткен. Олар көбіне домофондары дұрыс істемейтін көпқабатты үйлерде ұрлық жасаған. Пәтер есігін қағып, үйде адамның бар-жоғын тексерген. Ешкім жауап бермеген жағдайда, есікті кілт таңдау арқылы ашқан. Үйдегі компьютер, телефон, ноутбук, құлаққап, әшекей бұйымдарды ұрлап еткен.
«Бұл дерек Қылмыстық кодекстің 188-бабының 3-бөлігі бойынша соталды тергеп-тексерудің бірыңғай тізіліміне тіркелді. Іс бойынша жүргізілген жедел іс-шаралар нәтижесінде екі күдікті анықталып, ұсталды. Оларға қатысты «күзетпен ұстау» түріндегі бұлтартпау шарасы таңдалды. Бүгінде қылмыстық іс прокуратураға жолданды», – деді тергеуші Әлібек Кемелбек.
Екі күдікті бұған дейін де ұрлық үшін сотталған. Түрмеде танысып, бостандыққа шыққан соң істерін жалғастырған. Олар жасаған қылмыстарын мойындады.
