Ақмола облысы Аршалы ауданы Қостомар елді мекенінде «Nur Otan» партиясының облыстық сайлауалды бағдарламасы аясында Орта Азиядағы ең ірі жел электр стансасы құрылысының екінші кезеңі жүзеге асырылды. Сөйтіп, партияның Жол картасы аясында салынып жатқан нысан болашақта 10 000 отбасын энергиямен қамтитын болады.
Экологиялық маңызы зор жоба жел қуатын электр энергиясына айналдырып, қоршаған ортаға ешбір нұқсан келтірмейді. Нысанның қолданысқа енгізілуі атмосферадағы зиянды газдардың көлемін жылына 230 мың тоннаға азайтуға мүмкіндік береді. Экологиялық тиімділігімен қатар, жел стансасының құрылысы 100 жұмыс орнының ашылуына себепші болды. Ал құрылыстың екінші кезеңі аяқталған соң 20 адам тұрақты жұмыс орнымен қамтылды. Жоба шеңберінде қазіргі заманғы технологиялар стансаның өзінен де, сондай-ақ қашықтан да жел электр стансасының жұмысын басқаруға және мониторингтеуге арналған диспетчерлік бақылау және деректерді жинау жүйесін (SCADA) енгізу көзделген. SCADA қондырғысы энергия жүйесін және стансаның қуатын бақылауға мүмкіндік береді. Сондай-ақ жобада автоматтандырылған жұмыс орындарын ұйымдастыра отырып, жел электр стансасының электр энергиясын өндірудің технологиялық процестерінің автоматтандырылған басқару жүйесін (АБЖ) қолдану қарастырылып отыр. Бұдан басқа, ҚС 220/35/10 кВ жел электр стансасының көтеруші қосалқы стансасында автоматика-релелік қорғанысының көпфункционалды микропроцессорлық құрылғылары және есепке алу аспаптары, оның ішінде ЭКЕАЖ негізінде заманауи кешенді басқару, автоматика, сигнализация және электр энергиясын есепке алу жүйесі көзделген.Дәулет АСАУ