Тараз қаласында «Қазіргі кезеңдегі этносаралық келісім: тәжірибе мен алдағы міндеттер» атты халықаралық ғылыми-практикалық конференция өтті. Іс-шараны Ақпарат және қоғамдық даму министрлігі, Жамбыл облысының әкімдігі, Қазақстан халқы Ассамблеясы және Қолданбалы этносаяси зерттеулер институты ұйымдастырды.
Отандық және Ресей, Украина, Өзбекстан, Израиль және Болгариядан келген шетелдік сарапшылар мен ғалымдар қатысқан конференция Президент Қасым-Жомарт Тоқаевтың құттықтау сөзімен ашылды. Президент өз құттықтауында жалпыұлттық бірлікті Қазақстанның барлық жетістіктерінің бастауында тұратын баға жетпес байлығымыз ретінде атап өтіп, Елбасы Нұрсұлтан Назарбаевтың басшылығымен елімізде этносаралық келісімнің өзіндік моделі қалыптасқанына тоқталған. Сонымен қатар Мемлекет басшысы Қазақстан өзінің ұлттық бірегейлігінің негізі саналатын «бірлігіміз – әралуандықта» деген қағидатты берік ұстанып келе жатқанын атап өткен. «Жаһандық және өңірлік деңгейдегі жаңа сын-қатерлер жағдайында ел бірлігін нығайтудың маңызы арта түсті. Адамзат әлі күнге дейін төзімсіздік пен ксенофобиядан арыла алмай отыр. Көптеген мемлекетте этносаралық сипаттағы әлеуметтік шиеленіс өршіп барады. Сондықтан халықаралық қауымдастықтың алдында осы түйткілді мәселені шешудің тиімді жолдарын іздеу, қоғамдық дамудың жаңа инклюзивті моделін әзірлеу міндеттері тұр. Бұл ретте сарапшылар мен кәсіби зерттеушілердің ғылыми ұстанымнан айнымай, белсенді жұмыс істеуі аса маңызды», – делінген құттықтауда. Жиында «көпэтносты елді мекендердегі әлеуметтік проблемаларды шешудегі жергілікті атқарушы органдар мен азаматтық институттардың рөлі», «шиеленістер мен наразылық көңіл күйлердің алдын алу және оларды ескерту», «мультимәдени ортадағы қақтығыстардың алдын алу ісіне ғылыми-сараптамалық әлеуетті пайдалану», «қоғамдық келісімді нығайтудағы Қазақстан халқы Ассамблеясы мен БАҚ-тың рөлі» тақырыптарында секция отырыстары өтті. Конференцияның бірінші күні сарапшылар қақтығыстар мен наразылық көңіл күйлердің негізгі себептері, заманауи қоғамдардағы этногенездің жаңа аспектілері, жергілікті деңгейде этносаралық қатынастарды реттеудегі жергілікті атқарушы органдардың рөлі және әлемдік тәжірибе, этносаралық интеграция саласындағы әлеуметтік-экономикалық саясат сынды тақырыптарды талқылады. Конференцияның екінші күні қатысушылар шекара маңы ынтымақтастығы және халық дипломатиясы, әлеуметтік желілердегі қақтығыстық жұмылдыру, жаһандану және ксенофобия, қақтығыстарды басқару және бірегейлік саясаты, ақпараттық қауіпсіздік және басқа да өзекті тақырыптар жайлы сөз қозғады. Жиынға қатысқан сарапшылар мұндай тақырыптардың көтерілуінің өзі маңызды екенін атап өтті. Украиналық саясаттанушы Андрей Бузаров жиынның Жамбыл жерінде өтуіне назар аударды. «Бұл тақырыптағы конференцияның Жамбылда өтуі өте маңызды, өйткені мұнда этносаралық диалог құру тәжірибесі қалыптасқан. Егер келіспеушіліктің этносаралық аспектілері, тілге қатысты түсініспеушіліктер болса, оны ушықтырудың қажеті жоқ, ерте бастан алдын алып, оларды тыңдай білу керек. Сіздер осыған айрықша ден қойғансыздар. Бұл аса маңызды», – деді Андрей Бузаров. Ал израилдік саяси сарапшы Дэвид Эйделман: «Дәл осы Таразда бірегейлік саясатына қатысты сұрақтардың талқылануының символдық мәні зор. Мені осы тұрғыдағы мәселелердің қазақстандық шешу жолдары қызықтырады. Өйткені Қазақстан – этностық тұрғыдан өте күрделі мемлекет. Мысалы, Украинадағы секілді жағдайлардың болмауына сіздердегі саяси басшылықтың, Тұңғыш Президент – Елбасы мен қазіргі Мемлекет басшысының еңбегі елеулі», – деді.А.СҰЛТАН