Елде қалыптасқан отын дағдарысына орай Үкімет осындай шетін шешім қабылдапты. Осы орайда Энергетика министрі Мағзұм Мырзағалиев ішкі нарықты дизель отынымен қамту мәселелері бойынша Атырау мұнай өңдеу зауытында көшпелі кеңес өткізді.
«ҚазМұнайГаз» ұлттық компаниясының дерегінше, қазір отандық мұнай өңдеу зауыттары барынша жүктелген. Мұнай өнімдерінің негізгі түрлері бекітілген жоспардан тіпті асыра өндірілген. Онда неге дизель тапшылығы туындады? Қазақстан арқылы өтетін Ресей, Қытай, Беларусь және басқа да елдердің алып фуралары құйып әкетеді. – Тамыз-қыркүйек айларында Қазақстанда дизель отынын нормадан тыс жоғары тұтынуы тіркелді. Мұның себебі дизель бағасы төмен болғандықтан, оны транзиттік жүк көліктері әкетіп жатыр. Энергетика министрлігі нарықты тез арада тұрақтандыру және сапалы отынмен қамтамасыз ету міндетін қойды. Күн сайын Шымкент зауытында шамамен 5,5 мың тонна, Атырау зауытында 4,4 мың тоннаға жуық дизель өндіріледі, – деді ұлттық компания басқарма төрағасының орынбасары Данияр Тиесов. 14 күн ішінде екі зауыт 133 мың тонна дизель отынын өндірді, бұл жоспарлы көрсеткіштерден 4 мың тоннаға артық. Өткен 9 айда үш МӨЗ барлығы 3,7 млн тонна дизель отынын шығарған. Сондай-ақ ол нарықта қалыптасқан жағдайға байланысты Атырау МӨЗ-ін жөндеуді келесі жылға ауыстыру туралы шешім қабылданғанын хабарлады. Осы жылдың 9 айында АМӨЗ 4 млн тонна мұнай өңдеп, 1 168 276 тонна дизель, 935 738 тонна бензин жасады. Энергетика министрі мұнай өңдеуші компаниялар басшыларынан МӨЗ-дердің үздіксіз жұмысын қамтамасыз етуді талап етті: «МӨЗ басшылығы мен ұжымының бірінші кезекті міндеті – зауыттың сенімді және тұрақты жұмыс істеуі. Әртүрлі сылтау айтуға болады. Алайда елде мұндай жағдай енді қайталанбауы тиіс», – деді М.Мырзағалиев.Айхан ШӘРІП