Үкімет Қазақстан халқының мейлінше көп бөлігі жалпыұлттық санаққа жаңа форматта – онлайн қатысуы үшін қолдан келгеннің бәрін жасады. Тіпті, осы іске мұғалімдер жұмылдырылған: сынып жетекшілері ата-аналар чаттары арқылы оқушылардың ата-аналарынан санақтан онлайн өтіп, соны дәлелдейтін кодты жіберуді талап еткен. Нәтиже не болды?
Ұлттық статистика бюросының басшысы Нұрболат Айдапкеловтің хабарлауынша, қазақстандықтардың 39,6 пайызы халық санағының сауалдарына онлайн режимде жауап берді. «16 қазаннан бастап санақ сауалдарына онлайн режимде жауап беру функциясы тоқтатылды. 45 күн ішінде халқымыздың 40%-ға жуығы немесе 7 527 458 адам санақтан өтудің осы жолын таңдады. Ал біздің интервьюерлер 3 миллион 792 мыңнан аса адамға сауалнама жүргізген. Осылайша, санақтан өткендер үлесі бүгінде 60 пайызға жетті», – деді бас статистикашы. Онлайн санақтан өтпегендердің үйлеріне 30 қазанға дейін интервьюерлер барады. Ал онлайн жауап бергендер санақтан өткені туралы sms-хабарлама жіберу не өзіне айту арқылы интервьюерлерді құлағдар етуі керек. Оларға сауалнама қайта жүргізілмейді. «Халық санағы – еліміз үшін аса маңызды шара. Сондықтан оған бір кісідей жұмылып, атсалысуымыз қажет. Интервьюерлер де ел азаматтары екенін ұмытпайық. Еңбегін бағалап, құрмет көрсетіп, түсіністік танытуларыңызды сұраймыз», – деді Н.Айдапкелов.Елдос СЕНБАЙ