Сенат Спикері Мәулен Әшімбаевтың төрағалығымен өткен палата отырысында сенаторлар мемлекеттік сатып алу мәселелері туралы заң жобасын екінші оқылымда қарап, түзетулер енгізіп, Мәжіліске қайтарды. Сенаторлар ондағы бір көзден алу тәсілімен мемлекеттік сатып алуға қажетті негіздердің санын қысқарту жөніндегі жаңашылдықты құптады.
Сондай-ақ мұндай сатып алу бойынша тапсырыс берушінің бірінші басшыларының жеке жауапкершілігін арттыруға және тағы басқа басымдықтарға қолдау білдірді. Сенат депутаттары бір компанияның бір құрылыс нысанында инжинирингтік қызметтер мен құрылыс-монтаждау жұмыстарын алу үшін мемсатып алуға қатысу мүмкіндігін жоюды, сондай-ақ электрондық дүкенді мемлекеттік сатып алуды жүзеге асырудың бәсекелі тәсілдеріне қосуды қосымша ұсынды. Бұл коррупция қаупін азайту және салынып жатқан нысанның сапасын жақсарту үшін маңызды екен. «Негізгі өзгерістер мемлекеттік сатып алу саласындағы заңнаманы одан ары жетілдіруді көздейді. Оның ішінде байқау өткізу кезінде сыбайлас жемқорлық қаупін барынша азайтуға баса мән берілген. Заң жобасы мемсатып алу рәсімдерін оңайлатып, артық реттеуді жоюға жол ашады. Сол арқылы мемсатып алуларды тиімді өткізіп, мемлекет қаражатын үнемдеуге мүмкіндік аламыз», – деді Мәулен Әшімбаев. Осылайша, сенаторлар қоғамның пікірін ескеріп, жедел әрекет етті. Сондай-ақ заң жобасы халықтың қауіпсіздігіне арналған жаңа нормалармен толықты. Атап айтқанда, ары қарай сақталуы айтарлықтай қауіп төндіретін және дереу жоюды қажет ететін оқ-дәрілерді анықтау қағидаларын қалыптастыру мәселесі пысықталды. «Сенат енгізіп отырған түзетулер қару-жарақты сақтау және оны жою жолдарын реттеуге бағытталған. Бұл – соңғы уақытта еліміздегі қару-жарақ қоймаларында болған трагедиялық жағдайлар қайталанбауы үшін жасалған қадам», – деді М.Әшімбаев. Заң жобасына отандық ғылымды дамытуға бағытталған нормалар бар. «Түзетулер Мемлекет басшысының ғылым саласын дамытуға қатысты тапсырмаларын іске асыруды көздейді. Базалық қаржыландыру арқылы жетекші ғалымдарға еңбекақы төлеу, іргелі ғылыми-зерттеулер жүргізетін ғылыми ұйымдарды тікелей қолдау үшін қаржыландырудың жаңа түрін енгізу ұсынылып отыр. Ғылыми, ғылыми-техникалық жобалар мен бағдарламаларды қаржыландыру мерзімін қазіргі 3 жылдан 5 жылға дейін ұлғайту қарастырылған», – деді Сенат Төрағасы. Отырыста «Каспий теңізінің ортасын қорғау жөніндегі негіздемелік конвенцияға Каспий теңізін жерүсті көздерінен және құрлықта жүзеге асырылатын қызмет нәтижесінде ластанудан қорғау жөніндегі хаттаманы» ратификациялайтын заң қабылданды. Сондай-ақ Сенат депутаттары палата Спикерінің ұсынуымен Расул Рахимовті Есеп комитетінің мүшесі қызметіне тағайындады.Елдос СЕНБАЙ