Монополиямен күресуші орган қытайлық инвестордың әрекеттерінен жосықсыз, адал емес бәсекелестік белгілерін әшкереледі. Әңгіме Қытай ұлттық мұнай-газ корпорациясының еншілес ұйымы – «CNPC-Ақтөбемұнайгаз» жайында. Бәсекелестікті қорғау және дамыту агенттігінің хабарлауынша, Ақтөбе облысы бойынша монополияға қарсы департаментке өтініш түсті.
Онда «СНПС-Ақтөбемұнайгаз» АҚ құбырларды сатып алу кезінде өзінің конкурстық құжаттамасында құбыр өнімдерін нақты бір жеткізушіден ғана сатып алуды көздейтін техникалық шектеулер белгілегені айтылған. Сол арқылы еліміздегі мұнай-газ кешенінің алпауыты «адал бәсекелестік қағидаттарын бұзған және жеткізушілердің кең тобының конкурсқа қатысуын шектеген». Монополияға қарсы департамент өтінішті зерделеу барысында баяндалған мәліметтердің дұрыстығын анықтады. «СНПС-Ақтөбемұнайгаз» АҚ құбырларын сатып алу ерекшелігінде көрсетілген құбыр өнімдерінің техникалық сипаттамалары тендерге қытайлық CNPC тобына кіретін компанияның жеңуіне ғана мүмкіндік берді. Осылайша, адал бәсекелестік қағидаттары бұзылып, отандық өнім берушілердің алдына тоспа қойылыпты. Осының негізінде Ақтөбе облысы бойынша монополияға қарсы департамент оларды жою бойынша шаралар қабылдау үшін «СНПС-Ақтөбемұнайгаз» АҚ-ның атына хабарлама жіберді. Инвестор монополияға қарсы органға хабарламаны орындау мерзімін ұзарту туралы қарсы өтініш жасады, алайда хабарламаны орындау үшін қосымша уақыт қажет болмағандықтан бұл сұрауды қанағаттандырудан бас тартылды. Нәтижесінде, агенттік хабарламасы толық көлемде орындалды: құбырларды сатып алу тендерінің күші жойылды.Ерік ЕРДЕНОВ