Жаһандық бренд иелерімен 1,5 жыл бойы соттасқан қазақстандық антимонополияшылар жеңіске жетті. Алматы қаласы бойынша Монополияға қарсы департамент шығарған ұйғарымды сот ақыры заңды деп таныды.
2019 жылдың маусымында Алматы қаласы бойынша Монополияға қарсы департаментіне «Юнилевер Қазақстан» ЖШС-ның (Rexona бренді) жөн-жосықсыз және шындыққа сәйкес келмейтін жалған жарнамасына қатысты шағым түседі. Өтінішті қарау барысында департамент компания қолтықтың терлеуін тоқтататын Rexona атты өнімін сату кезінде «Жағымсыз иістен 10 есе жақсы қорғау» ұранын қолданғанын анықтады. Алайда жаһандық брендтің уәдесі микробиологиялық in-vitro тест нәтижелері бойынша алынған деректерге сәйкес келмепті. Осының негізінде Монополияға қарсы департамент «Юнилевер Қазақстан» ЖШС атына жосықсыз бәсекелестікті тоқтату және алдағы уақытта Қазақстанның бәсекелестікті қорғау заңнамасын бұзуға жол бермеу туралы хабарлама енгізді. Хабарлама орындалды, компания өтірік мағлұмат жазылған тауарды сатуын тоқтатты. Ал қаптамасына зерттеу нәтижесінде алынған нақты деректер көрсетілді: «Микробиологиялық in-vitro тестінің нәтижелері бойынша – бактерияларға қарсы 10 есе жақсы қорғау: антиперспирантты пайдаланбай тек кәдімгі сабынмен салыстырғанда қолданғаннан кейін 5 және 24 сағаттан кейін бактерияларды 10 есе қысқарту» деген жазу пайда болған. Ізінше 2019 жылдың қазанында Алматы қаласы бойынша Монополияға қарсы департаментіне енді «Юнилевер Қазақстан» ЖШС-інен бәсекелесі «Байерсдорф Қазақстан» ЖШС-ның әрекетіне қатысты өтініш келіп түсті. Онда: «Төл сайтында және дүкен сөрелерінде орналастырылған жарнамалық материалдарында «Nivea қара және ақ көрінбейтін» антиперспиранты «Дақтарға қарсы әлемдегі №1 антиперспирант» деген мәлімдеме жасады, мұнысы шындыққа жанаспайды» делінген. Тексеру барысында бұл ақпарат расталды. «Байерсдорф Қазақстан» ЖШС атына Қазақстан заңнамасын бұзуды тоқтату және алдағы уақытта жол бермеу туралы хабарлама енгізілді. Алайда ол хабарламаны орындамады. Сондықтан Монополияға қарсы департамент тергеу жүргізді. Соттасу басталып, ол 1,5 жылға созылды. Алматы қалалық соты департаменттің нұсқамасын заңды және негізді деп таныды. 30 қыркүйекте «Байерсдорф Қазақстан» ЖШС өз өнімінен жалған ақпаратты жойып, нұсқаманы орындады.Ерік ЕРДЕНОВ