Елордадағы Назарбаев зияткерлік мектебінің 12 С сынып оқушысы Сәнім Зейінғабыл еліміздің ресми эко-амбассадоры атанды.
Эко-Амбассадор – экологиялық бастамалар мен жобаларды табысты ілгерілетудің маңызды және ажырамас бөлігі. Табиғат жанашырларына экологиялық жобаларды ілгерілетуге, экологиялық сананы дамытуға, күнделікті өмірде экологиялық қағидаларды ұстану қажеттілігіне ықпал ету ерекше міндеті жүктелген.– Менің жобам ол мектептегі экологиялық қозғалысты дамыту, танымдылықты арттыру болатын. Сондықтан мен эко клубтың лидері ретінде өткен жыл бойы онлайн режимде көптеген республикалық және халықаралық іс-шара өткіздім. Мәжіліс депутаты, министрліктің өкілдері, бизнес өкілдері, Қазақстандағы экологияны негіздеген өкілдермен жұмыс істедім. Халықаралық іс-шарадан кейін, министрлік өкілдері жасалған жұмысты ескере отырып, мектептің ұсынысымен мені Қазақстанның ресми Эко-Амбассадорлығына ұсынды, – дейді ол.Жас табиғат жанашырының айтуынша, адам қоршаған ортаның тазалығы үшін жауапкершілікті өзіне алып, электр энергиясын, суды үнемдеу, экологиялық тұрғыда таза өнімді қолдану сияқты қарапайым ережелерді сақтай білуі қажет. Бұл тұста, Назарбаев зияткерлік мектептері эко белсенділерді үнемі қолдау үстінде. БҰҰ-ның Адам құқықтары жөніндегі Жоғарғы комиссары Мишель Бачелеттің айтуынша, жыл сайын қолайсыз экологиялық жағдайлардың, әсіресе ауа мен судың ластануының салдарынан бес жасқа дейінгі 1,7 миллион бала қайтыс болады, бұл бүкіл әлемдегі балалар арасындағы өлімнің төрттен бір бөлігін көрсетеді. Осы тұста Сәнімнің арқалаған жүгі ауыр.
Айбике ЖАНАСЫЛ