Еңбекпен есейіп, абырой биігіне көтерілген халқымыздың даңқты перзенттері хақында сөз қозғағанда алғашқылардың қатарында Жазылбек Қуанышбаевтың есімі еске оралатыны хақ. Аты аңызға айналған шопан, екі мәрте Социалистік Еңбек Ерінің 125 жылдық мерейтойы Жамбыл жерінде дүркіреп өтті.
Ең әуелі Тараз төрінде даңқты шопанның бейнесі суреттелген барельеф мемориалдық тақтасы мен «Ауыл шаруашылығы» скверінің салтанатты ашылуы өтті. Іс-шараға еліміздің Ауыл шаруашылығы министрі Ербол Қарашөкеев, облыс әкімі Бердібек Сапарбаев, Жазылбек Қуанышбаевтың туыстары мен өңір тұрғындары қатысты. – КСРО-ның екі мәрте Социалистік Еңбек Ері Жазылбек Қуанышбаевтың туғанына 125 жыл толуына орай, биыл дала академигінің есімі мен мұраларын насихаттау бойынша жұмыстар жүргізіліп жатыр. Ол қаракөл қойының тұқымын сұрыптауға және жақсартуға үлкен үлес қосты. Жазылбек Қуанышбаев өзінің тәжірибесін жас шопандармен бөлісіп, балаларды жастайынан еңбекке баулыды. Бүгінде оның жұмыс тәжірибесін тарату, жас ұрпаққа еңбектегі ерліктері туралы насихаттау аса маңызды, – деді облыс әкімі Бердібек Машбекұлы барельефтің ашылуында. Ауыл шаруашылығы министрі Ербол Қарашөкеев жиылғандарды қуаныштарымен құттықтады. – Жазылбек Қуанышбаев қой шаруашылығының дамуына, мал басының өсуіне өлшеусіз үлес қосып, әр жүз саулықтан 130-140 қозыдан алған даңқты шопан. Оның қажырлы еңбегінің арқасында сонау құмды өлкеде Қазақстандағы қой шаруашылығының негізгі базасы құрылды. Қазақ халқының даңқты перзентінің мерейтойы ел Тәуелсіздігінің 30 жылдығымен тұспа-тұс келіп отыр. Жамбылдықтарды шын жүректен қос мерекемен құттықтаймын! – деді Ауыл шаруашылығы министрі. Ал Жазылбек Қуанышбаевтың баласы мен немересі аталарына көрсетілген құрмет үшін облыс әкімі мен осы іске ұйытқы болған азаматтарға алғысын білдірді. Жалпы, сквер «Таразға тарту» жобасы аясында Ауыл шаруашылығы және Ветеринария басқармасының демеушілігімен салынған. Мұнда тұрғындарға арналған демалыс орындарымен қатар, төрт түліктің бейнелері бейнеленген мүсіндер қойылған. Ал сквер орналасқан көшеге мереке күні Еңбек Ері Жазылбек Қуанышбаевтың есімі беріліп, көпшіліктің қуанышын еселей түсті. Мерекелік іс-шара бұдан әрі бірінші республикалық ғылыми-тәжірибелік конференцияға ұласты. Конференцияның ашылуында облыс әкімі Мемлекет басшысы Қасым-Жомарт Тоқаевтың арнайы жолдаған хатын қатысушыларға таныстырды. Президент хатында Жазылбек Қуанышбаев еліміздің мал шаруашылығын дамытуға өлшеусіз үлес қосқан даңқты шопан екені, көп жылғы ерен еңбегінің арқасында аса танымал тұлғаға айналғаны айтылған. Сондай-ақ Тараз қаласында даңқты шопанға лайықты құрмет көрсетіліп, барынша дәріптеліп жатқанына оң бағасын берген. Конференцияда облыс әкімі жиынның маңызына тоқтала келе, Елбасы мен Мемлекет басшысының қолдауының арқасында Жамбыл облысында ауыл шаруашылығын дамытуға бағытталған бірқатар ірі жобаларды тілге тиек етті. – Қазір облыста қаракөл қой шаруашылығын дамыту мақсатында 3 қожалық құрылды. Осы саладағы жетекші ғалымдармен бірге қойды қолдан ұрықтандыру технологиясы пайдаланылып жатыр. Өңірдегі мал саны 4,0 миллион басты құрап, 4,5 пайызға артты. Ұсақ мал басы 3,7 пайызға өсіп, 3 435,5 мыңға жетті. Биыл қаржы институттары арқылы «Сыбаға» бағдарламасы бойынша 1 271,0 миллион теңгеге 29,7 мың бас қой сатып алынды, – деді аймақ басшысы. Конференция соңында «Жалпақ жұрттың Жаз атасы» атты кітаптың тұсауы кесілді. Мереке күні Қазақстан малшыларының алғашқы республикалық слеті де өтті. Сондай-ақ салаға серпін берген азаматтар арнайы марапатталды. Сала ардагерлері Ауыл шаруашылығы министрлігінің «Еңбек ардагері» және «Ауыл шаруашылығы саласының үздігі» төсбелгілерімен құрметтелді. – Мұндай деңгейде малшылардың слеті алғаш рет өтіп отыр. Біз өзекті мәселелерді талқылауға, тәжірибе алмасуға мүмкіндік алдық, – деді «Үздік шопан» номинациясын жеңіп алған Т.Рысқұлов ауданының малшысы Сейтбек Дүйсенов. Облыс әкімі Бердібек Сапарбаев шаруа қожалықтардың озат шопаны мен жылқышыларына 15 миллион теңге көлемінде сертификат табыс етті. Бұл қаржы олардың отбасы үшін тұрғын үй салуға жұмсалмақ. Сондай-ақ аймақ басшысы «Жылы бұлақ Меркі» шаруа қожалығының шопанына Lada Vesta автокөлігінің кілтін табыстады. Бұл күні той қонақтары «Қазақтың қара шалы» фильмі мен А.Тоқпанов атындағы Жамбыл облыстық қазақ драма театрында екі мәрте Социалистік Еңбек Ері атанған Ж.Қуанышбаев пен Ы.Жақаев туралы театрландырылған қойылымды тамашалады. Мерейтойдың екінші күні салтанатты іс-шаралар Жаз-Атаның туған топырағы Мойынқұм ауданында жалғасты. Мұнда Жазылбек Қуанышбаевтың ескерткішіне гүл шоқтары қойылып, қонақтар даңқты шопанның атындағы музейді аралап, күрестен өткен республикалық турнирді тамашалап, «Жалпақ жұрттың Жаз-Атасы» атты конференцияға қатысты.Саятхан САТЫЛҒАН, Жамбыл облысы