Бұдан былай Корея Республикасы, Өзбекстан және Жапонияда жүрген немесе сол жақта қызмет бабымен тұрып жатқан Қазақстан азаматтары төлқұжатты бар-жоғы бір ай көлемінде қолына ала алады. Бұл туралы ақпарат ҚР СІМ сайтында жарияланды.
«Мемлекеттік қызметтің бұл түрі 2021 жылдың қазан айынан бастап Корея Республикасы, Өзбекстан Республикасы және Жапония аумағында тұрып жатқан Қазақстан Республикасының азаматтары үшін қолжетімді болды. Қазақстан Сыртқы істер министрлігі және Ішкі істер министрлігі аталған пилоттық жобаны құжаттарды қабылдау және оларды Қазақстанның шет елдерде жүрген азаматтарына паспорттар жасау үшін жіберу бойынша мемлекеттік қызмет көрсету процесін оңтайландыру аясында іске асыруда» делінген ведомство сайтындағы мәлімдемеде.
Шетелдегі азаматтарымызды құжаттандыруды 80 күннен 30 күнге дейін қысқартуға мүмкіндік берген бұл пилоттық жоба бұған дейін Ресей, Германия мен АҚШ-та сәтті жүзеге асырылған.
ҚР мемлекеттік органдары паспорт ресімдеу мерзімін қысқартуды көздейтін елдердің географиясын кеңейту бойынша бірлескен жұмысты әрі қарай жалғастыруда.
Нұрболат АДЫРБЕК
