Түркістан облысының полицейлері зауытқа ондаған миллион теңгеге шығын келтірген экс-директорды ұстады. Тергеушілердің айтуынша, ол зауытқа тиесілі 6 бірдей техниканы сатып, ақшасын қалтасына басып, тайып тұрған. Кентау қалалық Полиция басқармасына жергілікті зауыттардың бірінен шағым түсті.
Онда аталған мекеменің бұрынғы директоры зауытқа тиесілі техникаларды сатып, қашып кеткені жазылған. Келтірілген жалпы шығын көлемі – 80 миллион теңгеге жуық. Бұл дерек Қылмыстық кодекстің 189-бабы (Сенiп тапсырылған бөтен мүлiктi иемденiп алу немесе талан-таражға салу) қылмыстық құқықбұзушылығы бойынша тіркелді. Істің толық мән-жайын анықтау мақсатында тәжірибелі полицейлерден жедел тергеу тобы құрылды. Тәртіп сақшылары қылмысқа қатысты күдіктіні ұстауға бағытталған жұмыс жүргізді. Нәтижесінде күдікті азамат Алматы қаласында бой тасалап жүрген жерінен ұсталды. Полиция қызметкерлері күдіктіні бірден полиция бөліміне жеткізді. Қазір күдікті азамат қамауға алынып, тергеу амалдары жүргізіліп жатыр. Белгілі болғандай, күдікті техниканы сатудан тапқан ақшаны өз қажеттілігіне жұмсаған. Алматыда жасырын қалудан үміттеніпті. Алайда полиция қызметкерлерінің қырағылығы арқасында күдікті аз уақыттың ішінде ұсталды.Айхан ШӘРІП