Коррупциямен күресетін құзырлы орган қалалар мен облыстарда арнайы операция өткізген. Оның егжей-тегжейі енді белгілі болды. Ауыл шаруашылығы министрлігінің ұйымдары мен бөлімшелерінде және әкімдіктерде 30-дан астам адам бюджет қаражатын ұрлады деген күдікке ілігіп отыр. Бұл жөнінде Сыбайлас жемқорлыққа қарсы іс-қимыл агенттігі төрағасының көмекшісі Шыңғыс Алекешев хабарлады.
«Антикоррупциялық қызмет кең ауқымды арнайы операция нәтижесінде АШМ-нің бағынышты ұйымдары мен бөлімшелеріндегі, сондай-ақ Нұр-Сұлтан, Шымкент қалаларының, Түркістан, Ақмола, Жамбыл, Шығыс Қазақстан, Батыс Қазақстан, Атырау және Ақтөбе облыстары әкімдіктеріндегі тұлғалар құрған қылмыстық топтардың жолын кесті», – деді Шыңғыс Алекешев. Оның айтуынша, ұсталғандар субсидиялауға бөлінген бюджет қаражатын ұрлаумен айналысқан. Бұған қоса, кәсіпкерлерден пара, заңсыз сыйақыларды жүйелі түрде алудың коррупциялық схемаларын ұйымдастырған көрінеді. «Қазір тергеу іс-шаралары жүргізілуде. Заттай дәлелдемелер тәркіленді. 30-дан астам тұлға анықталды. Олардың көбі мойындап, куәлік етуде және тергеушілермен ынтымақтасуда. Тергеу мүддесі үшін басқа ақпарат жариялауға жатпайды», – деп нақтылады агенттік басшысының көмекшісі. Бұған дейін Антикор қос мегаполисте, Түркістан, Шығыс Қазақстан, Батыс Қазақстан, Ақмола, Ақтөбе облыстарында тергеу-жедел іс-шаралары жүргізіліп жатқанын хабарлаған. Барлық тұтқындау ауыл шаруашылығына арналған субсидияларды ұрлаумен байланысты. Жалпы, бұдан бұрын хабарланғандай, кейінгі 5 жылдың өзінде субсидиялауға 2 триллион теңгеден астам қаржы шығындалған. Агроөнеркәсіп кешеніне қатысты қозғалған қылмыстық істердің жартысынан астамы субсидияны талан-таражға салумен байланысты.Айхан ШӘРІП