«Nur Otan» партиясының Жол картасы бойынша Ақтөбе облысында қолға алынып, атқарылған істердің бірқатары Ембі қаласына тиесілі. Мұнда бос тұрған үйлер жөнделіп, спорт кешені, биотазарту нысаны іске қосылды. Қаладағы ең ұзын көшелердің бірі жөнделді.
«Nur Otan» партиясы Ақтөбе облыстық филиалының төрағасы, облыс әкімі Оңдасын Оразалин және оның бірінші орынбасары Ербол Данағұлов Ембі қаласындағы 45 пәтерлік бес қабатты үйдің кілтін тұрғындарға табыстау салтанатына қатысты. Олар сондай-ақ көп жылдар бойы қараусыз қалған 90 пәтерлі бес қабатты үйде жүріп жатқан жөндеу жұмыстарының барысын да қарап шықты. Пәтерлер күрделі жөндеуден кейін жергілікті атқарушы органда кезекте тұрғандарға берілетін болады. Партиялықтар қаладағы Ж.Тілепбергенов көшесінің жолына жүргізілген жөндеу жұмыстарымен де танысты. Ұзындығы 2,7 шақырымдық жолға күрделі жөндеу жұмыстарын «Ремгорстрой» ЖШС жүргізген. Бұл көшедегі су ағатын құбырлар толығымен жаңартылған.
Бұдан бөлек, олар Samruk-Kazyna Trust әлеуметтік жобаларды дамыту қорының демеушілік қаражатына салынған спорт кешенін тексерді. Аталған нысан құрылысының құны 228 миллион теңгеден асады. Жоба «Менің елім» әлеуметтік инвестициялар бағдарламасы аясында жүзеге асырылған. Мұнда дзюдо, күрес, бокс, үстел теннисі, воллейбол, баскетбол мен футбол секциялары жұмыс істейді.
Кейін Ембіде кәріз ағынын биотазартатын, қуаттылығы 3 мың м3 болатын көптен күт-кен кешен іске қосылды. Кәріз жүйесінің суларын тазартатын биологиялық тазарту ғимаратының құрылыс жұмыстары 2019 жылы басталып, биыл аяқталды.Тұрмыстық суларды ағызуға және залалсыздандыруға арналған нысанды еңбек ардагері, бұрынғы Мұғалжар ауданының бірінші хатшысы болған Қуандық Әлішев және Ембі қалалық кеңесінің төрағасы Жұмабек Сарбасов іске қосты.
А.ЖАСАНҰЛЫ