Қазақстандық 8 жасар оқушы қыз Мәриям Ишанғалиева әлемнің супермоделі атанды.
Атырау облысына қарасты Құрманғазы ауданының Көптоғай ауылында тұратын Мәриям Ишанғалиева 3-сыныпта оқиды. Биылғы шілдеде «Әлемдік модель – 2021» халықаралық байқауына суреттерін жолдаған. Қыркүйекте байқау қорытындысы бойынша бірінші орынға ие болып, ақтық сайысқа жолдама алған. Жақында шешуші сайыс Сочиде қорытындыланды. Анасы Арай Қарабалаеваның айтуынша, биыл «Әлемдік модель» байқауына әлемнің 40 елінен үміткерлер қатысуы тиіс болған. Алайда коронавирус пандемиясына байланысты 25 үміткер бақ сынаған. Қазылар алқасының жеті мүшесі Мәриямды 6-9 жастағы қатысушылардың арасынан жеңімпаз деп таныды. Атыраулық оқушы байқаудың бас жүлдесін иеленіп, «Әлем жұлдызы» атанды. Оған «Жер шарының супермоделі –2021» аталымы қоса берілді. «Қызым жолға шығарда «Мен басыма тәж киіп келемін» дегенде, таңғалған едім. Сайыс кезінде аз-кем қобалжығаны байқалды. Өйткені халықаралық бәсекеде еліміздің атынан жалғыз өзі қатысты. Біз Құрманғазы ауданында тұрамыз. Сол себептен сахнаға Құрманғазының «Адай» күйімен шықты. Байқаудың тәжін басына кигізгенде қуаныштан жылап жіберді», – дейді анасы Арай Қарабалаева. Сегіз жасында әлемдік супер модель атанған Мәриям Ишанғалиева бос уақытында би үйірмесіне қатысып жүр. Бұған дейін облыстық, республикалық байқаулардың жеңімпазы атанған. Мәриямның арманы – Оңтүстік Кореяда жоғары білім алып, дәрігер болу.А.ЖАСАНҰЛЫ