Қаржылық мониторинг агенттігі кір жуу ұнтақтарын қолдан жасайтын жасырын цехты тауып, жапты. Контрафактілік тауарларды өндіру және сату – көп миллиардтық табыс әкелетін заңсыз бизнес. Ол Қазақстанда да белең алуда. Бұл мемлекетке де, азаматтардың денсаулығы мен қауіпсіздігіне де айтарлықтай зиян келтіреді.
Қаржылық мониторинг агенттігі контрафактіні өндіру және өткізу деректерімен күрес жүргізуде. Агенттіктің Түркістан облысы бойынша аумақтық департаментінің қызметкерлері контрафактілік кір жуу ұнтақтарын дайындайтын астыртын цех қызметінің жолын кесті. Жедел-іздестіру шаралары барысында Түркістан қаласының тұрғыны Р.Абдуллаев «Иштихат» тұрғын алабындағы Доспанбет жырау көшесінде цех ашқан. Бірақ бұл экономикаға үлес қосатын бизнес субъектісі емес: онда заңсыз жолмен Ariel, Тide, «Миф», Persil маркалы 2, 3, 6 келілік қаптарға қорапталған ұнтақтар дайындап келгені анықталды. Ұнтақтарды буып-түюге және өлшеп-орауға арналған 7 жабдық, 500-ден астам ұнтақ қаптамасы, 20 келілік 100-ден астам ұнтақ, белгілі маркалардың атаулары бар полиэтилен пакет тәркіленді. Құқық иесі The Procter& Gamble Company компаниясына зор залал келтірілген. Р.Абдуллаевқа 5,9 миллион теңге көлемінде айыппұл салынғаны мәлім болды.Елдос СЕНБАЙ