Мегаполис әкімі Бақытжан Сағынтаев өзінің Twitter-дегі аккаунтында британдық консалтингтік компания жүргізген рейтинг нәтижесі туралы хабарлады.
«Studee британдық консалтинг компаниясының дерегінше, Алматы студенттерге арналған әлемдегі ең үздік 100 қаланың бірі. Өмір сүру, тұрғын үйді жалға алу құны, интернет жылдамдығы, халықаралық рейтингке енетін жоғары оқу орындар саны сынды критерийлер бойынша Алматы 76-орында», – деп жазды Бақытжан Сағынтаев.
Деректерді талдау барысында Studee компаниясының зерттеушілері қалада тұратын 15 пен 24 жасқа дейінгі жастардың жалпы санын, тамақ өнімдерінің сапасын, сондай-ақ қауіпсіздік пен сөз бостандығы деңгейін басшылыққа алған.
Токио, Мельбурн, Сеул, Квебек және Аделаида сияқты әлемдік қалалар халықаралық рейтингтің көшбасшысы болды. Бұл ретте Алматы Варшаваны басып озып, бірден Нью-Йорктен кейін орналасты.
Осы рейтинг бойынша, Мәскеу 84-орында, ал Санкт-Петербург 98-орынға орналасқан.
