Науқас балалардың ата-аналары Маңғыстау облыстық ауруханасының жұқпалы аурулар бөлімшесіне шағым жасаған болатын, соған байланысты «Nur Otan» партиясының Ақтау қалалық филиалы төрағасының бірінші орынбасары, қалалық мәслихат депутаты А.Шамшадинова, Ақтау партиялық бақылау комиссиясының төрайымы Aйда Балқашбаева, Сыбайлас жемқорлыққа қарсы кеңес төрайымы Нұрсұлу Сейдалыева тексеру жүргізді.
Бірнеше ата-ананың айтуынша, сырқаттанған балаларын жатқызатын орын болмағандықтан, олар дәлізде және емдік шаралар бөлмесінде жатуға мәжбүр болған. Тіпті, аурухана асханасы ботқасының ішінен қоңыз шыққан. Мониторинг барысында мекеме аумағының тазалығы, материалдық-техникалық базасы, бөлмелердің санитарлық-гигиеналық, профилактикалық және сауықтыру іс-шараларының сапасы, емделушілердің қауіпсіздігі, тамақтану, бейнебақылау жүйесі, сәбилердің жан-жақты дамуына жасалып жатқан жұмыстар, тағы басқа да зерделенді. Тексеріс нәтижесінде үлкендерге арналған жұқпалы аурулар ауруханасы ғимаратының күрделі жөндеуді талап ететіні, науқастарға берілетін тағамның нәрсіз, тоңазытқышта тұрған дәрі-дәрмектің жарамдылық мерзімі шегіне жеткені анықталды. Кейбір дәрі-дәрмек кіреберістегі еденде шашылып жатыр. Сондай-ақ ауруханада санитарлық талап сақталмаған, науқастардың төсек жабдығы ескірген. Анар Шамшадинова бөлімше меңгерушісіне тазалық жұмыстарын күшейтуді тапсырып, алдағы уақытта рейдтік шаралардың тұрақты жүргізілетінін айтты. Ал Маңғыстау облыстық жұқпалы аурулар бөлімінің меңгерушісі, екінші санатты дәрігер Ж.Қашағанова өз кезегінде жағдайдың ушығып кеткенін, 60 орындық ауруханаға науқас бала көбейіп сыймай жатқанын жеткізді. Әсіресе, 1 жасқа дейінгі балалардың арасында іш өту, қызу көтеріліп кету кеселдері жиі тіркелген. Оның үстіне аурухана ғимараты ескі әрі тар, дәрігерлер жетіспейді. Айта кету керек, өңірде қазір жұқпалы вирустың, іш өту және қызылша ауруының таралуы өршіп тұр. Маңғыстау облыстық көпбейінді балалар ауруханасының жұқпалы аурулар бөлімшесінің қабылдау бөлмесіне тәулігіне 10-15, кейде одан да көп бала қаралуға келеді. Сондай-ақ күніне 10-20 бала жатып ем алады. «Бүгінде өңір бойынша қызылшамен ауырғандар саны көбейіп тұр. Біз емделушілер бір аурудан сауығып жатып, екіншісін жұқтырып алмау үшін қолдан келгеннің бәрін жасап жатырмыз»,– деді бөлім меңгерушісі. Мониторинг тобы Маңғыстау облыстық ауруханасының басшылығына анықталған кемшіліктерді жеделдетіп жою керегі жөнінде тапсырма беріп, аталған мәселе толықтай шешімін тапқанша Партиялық бақылау комиссиясының бақылауында болатынын ескертті.Би-Барыс КӨКШЕ