Қазақстанда өзіндік бір мерекелер маусымы басталды. Осыған орай Мәдениет және спорт министрлігі өнерсүйер қауымды жыл соңына дейін қандай мәдени іс-шаралар күтіп тұрғанын хабарлады. Тәуелсіздіктің 30 жылдығын мерекелеу аясында кең ауқымды іс-шаралардың соңғы кезеңі «30 жұлдызды күн» жобасы болады. Еліміздің мерейтойына орай мәдени іс-шараларды ілгерілетуге өңірлер белсенді тартылады. Ал мерекелік шаралар жыл соңына дейін жалғасады.
Жалпы алғанда, осы жоба аясында республика бойынша мәдениет саласында барлығы 1 600-ге жуық, 30-дан астам спорттық іс-шара өтеді. Оның ішінде, тек елордада 500-ден астам мәдени, 65 спорттық іс-шара ұйымдастырылмақ.
Атап айтқанда, 1 желтоқсанда Жамбыл Жабаевтың 175 жылдығын мерекелеу аясында «Астана Балет» театрында «Ұлттық хореография кеші» өтеді. Сондай-ақ 1 желтоқсанда Қастеев атындағы Мемлекеттік өнер мұражайында «Елбасы жолы» атты дөңгелек үстел ұйымдастырылады.
3-15 желтоқсан аралығында Жамбыл облыстық орыс драма театрында «Гүлдене бер, менің Қазақстаным!» композициясы сахналанады. 3-4 желтоқсанда «Астана Опера» театрында Еркеғали Рахмадиевтің «Алпамыс» операсының премьерасы өтеді.
4 желтоқсанда Семей қаласындағы Абай атындағы театрда «Ұлы Дала мұрасы» бағдарламасы аясында «Астана Балет» театрының гастрольдері басталады. 6 желтоқсанда «Тәуелсіздік толғауы» XI республикалық онлайн конкурсының және «Елім менің» XVII республикалық патриоттық әндер онлайн конкурсының финалы өтеді. Іс-шара Абай, Әбу Насыр әл-Фараби және Жамбыл Жабаевтың бай мұрасын насихаттау мақсатында ұйымдастырылған.
8 желтоқсанда Орал қаласындағы «Атамекен» өнер орталығында «Ұлы Дала мұрасы» бағдарламасы аясында «Астана Балет» театры Fuego Lento бір бөлімді балетін сахналайды. 10 желтоқсанда Құрманғазы атындағы Қазақ ұлттық халық аспаптары оркестрінің әртісі, Қазақстанның еңбек сіңірген қайраткері Санжан Сабырғалиеваның «Арнау» онлайн концертін тамашалауға болады.
10-14 желтоқсан аралығында Ғ.Мүсірепов атындағы Қазақ мемлекеттік академиялық балалар мен жасөспірімдер театрында С.Асылбекованың «Желтоқсан желі» драмасы көрсетіледі. 11 желтоқсанда Құрманғазы атындағы Қазақ ұлттық халық аспаптар оркестрі музыкасүйер қауымға «Тәуелсіздік – Тұғырым» концертін ұсынады.
11-12 желтоқсанда «Nur Otan» партиясының қоғамдық бірлестігімен бірлесіп X республикалық ақындар айтысы ұйымдастырылады.
12 желтоқсанда Абай атындағы Қазақ ұлттық опера және балет театрында лирикалық музыканың жанкүйерлері «Қазіргі қазақ композиторларының романстар кеші» концертін тамашалай алады.
15 желтоқсанда «Астана Опера» театрында үздік шығармашылық ұжымдардың қатысуымен Қазақстан Тәуелсіздігінің 30 жылдығына арналған концерт өтеді.
16-18 желтоқсанда Қ.Қуанышбаев атындағы Мемлекеттік академиялық қазақ музыкалық драма театрының сахнасында «Алтайдан ауған ел» спектаклінің премьерасы өтеді.
