Сыр халқы үшін Елбасының орны бөлек. Өйткені ел Тәуелсіздігін алған шақта Нұрсұлтан Назарбаевтың жұмыс үстелінде экологиялық апат аймағына айналған Қызылорда облысын тарату және Арал өңірі халқын көшіру туралы екі Жарлықтың жобасы жатты. Бірақ ұлт Көшбасшысы 1925 жылы Қазақ Республикасының алғашқы астанасы болған қасиетті мекеннің мәртебесін және жер бетінен жойылғалы тұрған Аралдың солтүстік бөлігін сақтап қалу туралы шешім қабылдады.
Осының арқасында бүгінде Қызылорда облысы өндірісі өркендеген, келбеті күн санап көркейген аймаққа айналды. Сондықтан болар, «1 желтоқсан – Тұңғыш Президент күні» мерекесін айрықша атап өтуді өңір тұрғындары парыз санайды.
Биыл да бұл үрдіс өз жалғасын тауып, Қызылорда облысының әкімі Гүлшара Әбдіқалықованың төрағалығымен 1 желтоқсан – Тұңғыш Президент күніне арналған «Тұңғыш Президент және Тәуелсіз Қазақстан: өркендеудің 30 жылы» атты республикалық ғылыми-практикалық конференция өтті.
Конференцияға Парламент Сенатының Әлеуметтік-мәдени даму және ғылым комитетінің төрағасы, саяси ғылымдар докторы Мұрат Бақтиярұлы, Қызылорда облыстық мәслихатының хатшысы Наурызбай Байқадамов, Ұлттық ғылым академиясының академигі, облыстық Қоғамдық кеңестің төрағасы Бақберген Досманбетов, облыстық Ардагерлер кеңесінің төрағасы Серік Дүйсенбаев, белгілі әнші-композитор, Роза Бағланова атындағы «Қазақ концерт» мемлекеттік ұйымының» директоры Жеңіс Сейдуллаұлы, айтыскер ақын, үш дүркін «Алтын домбыра» иегері Мұхтар Ниязов, Сыр толағайы, ауыр атлетші Илья Ильин, зиялы қауым өкілдері, облыстық Қазақстан халқы Ассамблеясының белсенділері, жоғары оқу орындарының басшылары мен ғалымдары, басқарма басшылары, үкіметтік емес ұйым өкілдері және онлайн байланыс арқылы аудан әкімдері мен зиялы қауым өкілдері қатысты.
Аймақ басшысы Сыр халқын Тұңғыш Президент күнімен құттықтап, Тәуелсіз Қазақстанның даму белесінде Елбасының рөлі мен жаңғыру кезеңіндегі Сыр елінің жетістігін тізбектеп берді.
– Баршаңызды Тәуелсіз еліміздің мәртебелі мерекесі – Қазақстан Республикасының Тұңғыш Президенті күнімен құттықтаймын! Биыл бірлігі бекем, татулығы жарасқан Қазақстан халқы Тәуелсіздіктің 30 жылдығын атап өтуде. Елбасының көшбасшылығы арқасында саяси жүйесі тұрақты, экономикалық әлеуеті мықты, ұлттық рухы берік, халықаралық беделі зор қуатты мемлекетті құрдық. Осы жасампаз істерді Елбасының серігі, Президентіміз Қасым-Жомарт Тоқаев жүйелі түрде жүзеге асыруда. Еліміз тәуелсіздік жылдары қаншалықты толымды табыстарға қол жеткізсе, оған Сыр елі де өз үлесін қосуда. «Сыр – Алаштың анасы», бұл – қазақ елінің алғашқы астанасы Қызылорда жайлы Елбасының сөзі. Екіншіден, Отандық ғарыш кеңістігінің өркендеуі. Қызылорда облысы – Қазақстанда ғана емес, әлемде ғарыштық кешен орналасқан стратегиялық маңызы бар өңір. Үшіншіден, халықаралық сарапшылар тарапынан «Ғасыр жобасы» аталған Арал теңізін сақтап қалу идеясы. Экологиялық апат аймағы ретінде тарап кеткелі тұрған облысымыз Тұңғыш Президентіміздің дана саясатымен Тәуелсіздік тарихында өз орнын сақтап қалды. Төртіншіден, «Батыс Еуропа – Батыс Қытай» жолы арқылы ел мен елді, жер мен жерді жақындатты. Бұл барлық ауданы теміржол мен автокөлік жолының бойында орналасқан Сыр елі үшін ең тиімді инфрақұрылымдық шешім, – деді Гүлшара Әбдіқалықова.
Конференцияда Мұрат Бахтиярұлы «Елбасы және ел тәуелсіздігі», Наурызбай Байқадамов «ҚР Тұңғыш Президенті – Елбасы Н.Ә.Назарбаевтың Тәуелсіз Қазақстанды қалыптастырудағы рөлі», Бақберген Досманбетов «Елбасы – елорда архитекторы», Серік Дүйсенбаев «Тұңғыш Президент және Сыр өңіріндегі дамудың өрелі 30 жылы» тақырыбында баяндама жасап, ұлт Көшбасшысы Ұлы даланың ұлы есімдерінің тікелей жалғасы, Тәуелсіз Қазақстанның негізін қалаушы ұлы реформатор Нұрсұлтан Назарбаевтың сарабдал саясаты туралы сөз қозғады.
Сонымен қатар Қызылорда облыстық Қазақстан халқы Ассамблеясы төрағасының орынбасары, неміс этномәдени бірлестігінің төрағасы Ирина Шек «Елбасы және Қазақстан халқы Ассамблеясы: бейбітшілік пен келісім жолы» тақырыбында баяндама жасаса, Жеңіс Сейдоллаұлы, Мұхтар Ниязов, Илья Ильин мен Талғат Тілес Тәуелсіз Қазақстанды қалыптастыру жолындағы азаматтардың үлесі туралы ой қозғап, жүрекжарды пікірлерін жеткізді.
