Құзырлы органдар мемлекеттік субсидия қаржысын ұрлағандарды әшкерелеуді жалғастыруда. Түркістан облысында Қаржылық мониторинг агенттігі осы демеу қаражатты жымқыру дерегінің жолын кесті. Әлеуметтік төлемдерді, ауыл шаруашылығы саласындағы мемсубсидияларды және өзге де бюджет қаражатын талан-таражға қарсы тұру мақсатында агенттік «Қазына» жедел-іздестіру іс-шараларын жүргізуде.
Мемлекет басшысы атап өткендей, бюджеттен әрбір теңге мақсаты бойынша жұмсалуы тиіс. Осы орайда агенттіктің Түркістан облысы бойынша аумақтық департаментінің қызметкерлері «Қазына» жедел алдын алу шарасы аясында «Сыбаға» мемлекеттік бағдарламасы бойынша бөлінген қаражатты жымқыру дерегінің жолын кесті.
Іс материалдарында айтылғандай, Е.Күзенбаев пен Р.Пайсханов «Балабоген-7» ЖШС атынан «Аграрлық несие корпорациясы» АҚ-нан асылтұқымды мал сатып алуға 380 миллион теңге несие қаражатын алады. Алайда корпорацияға бұл қаражатты Ресейден асыл сиырлар сатып алуға «Меркит» ЖШҚ шотына аудару туралы жалған құжаттар ұсынылады.
Бұдан ары олар несие шартының бір бөлігін өтеу үшін деп, Түркістан облысы әкімдігінің Ауыл шаруашылығы басқармасынан 131 миллион теңгеден астам сомаға қосымша мемлекеттік субсидиялар алыпты.
Бұл ретте, 585 бас ірі қара мал нақты сатып алынбаған. Тек Жануарларды есепке алу дерекқорына жалған мәліметтер енгізілген.
Нәтижесінде, 250 миллион теңге жымқырылған және мақсатқа сай пайдаланылмаған. Осы қылмысы үшін Р.Пайсханов 6 жылға, Е.Күзенбаев 5 жылға бас бостандығынан айырылды.
