Жаңа жыл қарсаңында «Қазақфильм» киностудиясы аумағында 2011 жылы ашылған жұлдыздар аллеясы жаңа есімдермен толықты. Оған қоса, отандық кинематографияның дамуына үлес қосқан танымал тұлғаларға арналған ескерткіштің салтанатты ашылуы өтті.
Қазақ кино жұлдыздарының аллеясына 13 жаңа есім қосылды, олардың арасында Халық жазушысы, Қазақстанның Еңбек Ері Олжас Сүлейменов, қазақ киносының ардагері, дыбыс операторы Қадыр Қосай, актриса, Қазақстанның еңбек сіңірген әртісі Меруерт Өтекешева бар. Ал ескерткіш жұлдыздар өмірден өткен әртістер мен еңбек сіңірген қайраткерлерді еске алу үшін жасалған
«Өкінішке қарай, қазақ киносының негізін қалаушылардың көбі арамызда жоқ. Оларды еске алып, ұмытпауымыз керек. Баршаңызды осы айтулы оқиғамен құттықтаймын, бәріңізге зор денсаулық тілеймін», – деді Қазақстанның Еңбек Ері Асанәлі Әшімов.
Салтанатты шара кезінде «Қазақфильм» киностудиясының президенті Ақан Сатаев Сатыбалды Нарымбетовтің ұлдарына Франциядағы кинофестиваль аясында берілген «Отандық кинематографияның дамуына үлес қосқаны үшін» сыйлығын табыстады.
