Аида Балаева журналист пен Бекболат Тілеухан арасындағы жанжалға қатысты пікір білдірді

Ақпарат және қоғамдық даму министрі Аида Балаева журналист Айнұр Коскина мен Бекболат Тілеухан арасындағы кикілжің туралы пікір айтты. Бұл туралы министр Facebook-тағы парақшасында жазды.

«Парламент ғимаратында журналист Айнұр Коскина мен сұхбат беруші Бекболат Тілеухан арасында болған оқиға журналистика кәсібінің ерекше қарым-қатынас дағдыларын қажет ететін ерекше мамандық екендігін кезекті рет дәлелдеді. Әрине, сұхбат берушінің журналистке қатысты эмоциялық әрекетін ақтау қиын (әсіресе журналистің әйел баласы екенін ескерсек). Мәдениетті қарым-қатынас этикасы кез келген сұхбат барысында сақталуы тиіс», – деді Аида Балаева. Алайда министр жұмыс барысында журналисте әдеп нормалары сақталуы тиіс екенін де айтты.

«Десе де, мәселенің екінші жағы да бар: ол – журналистің кәсіби білігі мен ішкі мәдениеті. Спикердің жеке өмірі құпиялығы мен құқығын сақтау, тақырып ауқымындағы сұрақтардан тыс ауытқымау, диалог логикасын нақты ұстану – бұл ешкім жоққа шығармайтын жалпыға ортақ өркениет ережелері. Қалай болғанда да Ақпарат және қоғамдық даму министрлігі журналистердің заңды мүддесін, кәсіби құқығын заң аясында қорғауда қашанда дайын», – деп жазды министр.

Бұған дейін «Хабар24» арнасының тілшісі мен күзетші арасындағы жанжалдан соң әкімдікті күзеткен компания лицензиясынан айырылған еді.