Қазақстандағы резиденттер депозиттік ұйымдарда 27,1 трлн теңгенің активін ұстап отыр. Ұлттық банктің мәліметі бойынша, желтоқсан айында депозиттік ұйымдарда ұсталатын ақшаның көлемі 5,1%-ға ұлғайып, 27 трлн 101,6 млрд теңгеге жеткен. Яғни, жылдық өсім 22,7% деген сөз. Оның ішінде заңды тұлғалардың депозиттері бір айда 13 трлн 836,6 млрд теңгеге дейін немесе 5,9%-ға өссе, жеке тұлғалардың депозиттері 13 трлн 264,9 млрд теңгеге дейін немесе 4,2% артқан. Ұлттық валютадағы депозиттердің көлемі бір айда 17 трлн 337,5 млрд теңгеге дейін немесе 7,1% ұлғайса, шетел валютасында 9 трлн 764,1 млрд теңгеге дейін немесе 1,7% көбейген. Демек, депозиттердің 36,0%-ы доллармен сақталып отыр. 2020 жылғы желтоқсанда оның мөлшері 37,3% болған. «Заңды тұлғалардың ұлттық валютадағы депозиттері 2021 жылғы желтоқсанда 8 трлн 629,3 млрд теңгеге дейін немесе 7,3% артқан. Шетел валютасында 5 207,3 млрд теңгеге дейін немесе 3,6% ұлғайды. Бұл – заңды тұлғаларға тиесілі депозиттердің 37,6%-ы», – делінген Ұлттық банктің ресми сайтында. Ал жеке тұлғалардың теңгедегі депозиттері 8 трлн 708,2 млрд теңге болса, шетел валютасында 4 трлн 556,7 млрд теңгеге азайды. Мерзімді депозиттердің көлемі бір айда 0,2%-ға ұлғайып, 17 трлн 896,2 млрд теңге болған. Оның ішінде ұлттық валютадағы салымдар 11 трлн 547,2 млрд теңге, шетел валютасындағы салымдар 6 349,0 млрд теңге болды.