ҰБТ кезінде талапкерді 2 камера қадағалайды - Аймағамбетов
ҰБТ кезінде талапкерді 2 камера қадағалайды - Аймағамбетов
Фото: tn.kz
Биыл Ұлттық бірыңғай тест кезінде талапкердің сынақ тапсыру барысын 2 камера қадағалайды. Бұл туралы Білім және ғылым министрі Асхат Аймағамбетов айтты, – деп хабарлады baribar.kz.
"Бұл – бізде жыл сайын дәстүрлі форматта өткізілетін тестілеу. Биыл оны ақпан айының соңына дейін жалғастырамыз. Өтініш білдірген барлық азамат осы тестіні тапсырып үлгеруі керек. Бұл міндетті грантты алуға бағытталған тест емес. Мұны кейбір азаматтарымыз дайындық ретінде қарайды. Басқалары жоғары оқу орындарына ақылы түрде түсу үшін таңдайды, оған сертификаты жарамды. Қалай десек те, бұл тестілеу түлектеріміз үшін маңызды. Сондықтан осы жұмысты тиісті деңгейде жүргізуіміз керек", – деді Асхат Аймағамбетов министрліктің аппарат жиналысында.
Сонымен қатар ол биыл ҰБТ барысында қолданылатын жаңа тетік жайында мәлімдеді.
"Ұлттық бірыңғай тестілеуді биыл да электронды форматта өткізуіміз қажет. Ашықтықты, әділдікті қамтамасыз ету – басты міндеттің бірі. Биыл жаңа тетіктер де енгізіледі. Оның ішінде қосымша камера болады. Яғни енді бір камера емес, 2 камера бір тест тапсырушыға арналып қойылады. Бір камера талапкердің тест тапсыру барысын қадағаласа, екінші камера сол адамның өзі отырған-отырмағанын белгіленген уақыттың ішінде суретке түсіріп, тіркейді. Тестілеудің басынан аяғына дейін басқа адам емес тест тапсырушының өзі отырғанын бақылайды. Fist Id функциясы бар арнаулы камера болады. Сондықтан осы жоспарларды тиісті деңгейде орындау қажет", – деді министр.