Тоқаев журналист Батыр Қазыбаевтың туған-туысына көңіл айтты
Тоқаев журналист Батыр Қазыбаевтың туған-туысына көңіл айтты
Фото: Б.Уәлидің Facebook-тағы парақшасынан алынды

Мемлекет басшысы белгілі журналист Батыр Қазыбаевтың дүниеден өтуіне байланысты көңіл айтты. Бұл туралы Президенттің баспасөз хатшысы Берік Уәли Facebook-тағы парақшасында жазды.

Президент Қасым-Жомарт Тоқаев белгілі журналист, медиаменеджер Батыр Қазыбаевтың дүниеден өтуіне байланысты оның анасы танымал қаламгер, ұстаз Орынша Қарабалинаға көңіл айту жеделхатын жолдады. – Ардақты ұлыңыз Батыр Кәкімжанұлы ақпарат саласында табысты қызмет етіп, ірі медиажобаларды жүзеге асырды. Отандық ақпараттық порталдар, радио мен телеарналардың негізін қалап, еліміздің журналистика саласының дамуына өлшеусіз үлес қосты. Өзінің табиғи қарапайымдылығымен, ұшқыр ойларымен және іскерлігімен елге сыйлы болды. Өмірде адал еңбек етіп, өз ісінің білгір маманы ретінде соңына өшпес із қалдырған Батыр Кәкімжанұлының жарқын бейнесі ұмытылмайды, – деп жазылған Президенттің жеделхатында.

Бұған дейін журналист Батыр Қазыбаевтың өмірден өткенін хабарлаған болатынбыз.