«Европа плюс Казахстан» радио арнасының радиожүргізушісі әлеуметтік желідегі жазбасы үшін жауапкершілікке тартылады. Алматы қалалық Полиция департаменті бастығының орынбасары Рүстем Әбдірахманов радиотілшінің үстінен Қылмыстық кодекстің 174-бабына («Ұлтараздықты қоздыру») сай қылмыстық іс қозғалғанын хабарлады.
«Сотқа дейінгі тергеп-тексеруді жүргізу қалалық Полиция департаментінің Тергеу басқармасына тапсырылды. Тиісті сараптамалар тағайындалды. Олардың қорытындысы бойынша процессуалдық шешім қабылданады. Қылмыстық істі тергеудің барысы мен нәтижесі Алматы қалалық Полиция департаментінің бақылауында», – дейді Рүстем Әбдірахманов.
Кеше «Европа плюс Казахстан» радио арнасы «шеттен шыққан» қазақстандықтардың мәселесін шешуге «Вова» көкесін» шақыратынын жариялаған журналистпен еңбекшартын бұзғанын хабарлаған еді.
