Алматы облысының полицейлері ҰҚК қызметкерлерімен бірлесіп, қаңтардағы тәртіпсіздікті ұйымдастырып, оған қатысқан 11 күдіктіні ұстады. Бұл туралы Алматы облыстық полиция департаментінің баспасөз қызметі мәлімдеді.
Облыстық ПД-ның берген мәліметінше, 20-39 жас аралығындағы күдіктілер облыстың әр ауданынан ұсталған. Олардан бұрын тәртіп сақшыларынан ұрланған атыс қарулары, арнайы қорғаныс құралдары мен оқ-дәрілер тәркіленді.
«Рұқсат етілген тінту кезінде күдіктілерден екі тегіс ұңғылы аңшы мылтығы, оқ-дәрілер, полицияның броньдары және құқық қорғау және қауіпсіздік шараларында қолданылатын арнайы техника табылды. Тәркіленген қару-жарақ пен мүлік бұрын қалалық және облыстық полиция ғимараттарына шабуыл жасау кезінде ұрланғаны анықталды», – дейді Алматы облысы ІІД баспасөз қызметінің өкілі.
Сондай-ақ осы операция кезінде бұған дейін де ұйымдасқан қылмыстық топтың белсенді мүшесі болып келген Сарқан ауданының 37 жастағы тұрғыны ұсталды.
Жеке тінту кезінде одан «Макаров» тапаншасы, оған арналған оқтар және гашишке ұқсас ерекше иісі бар, салмағы 210 грамм жасыл түсті заттың бір бумасы табылған.
Полиция ұсталғандардың қаңтар оқиғасына қатысқаны бейнежазба арқылы расталып отырғанын атап өтті. Белгілі болғандай, күдіктілердің облыс әкімдігі мен қалалық полиция ғимараттарын басып алуға қалай қатысқаны, сондай-ақ тәртіп сақшылары мен әскери қызметкерлерге күш қолданғаны бейнебақылау камераларында анық жазылып қалған.
«Бүгінгі таңда басқа деректермен қатар, негізінен бейнежазбалардан алынған тәртіпсіздіктерге қатысқан адамдарды анықтау жалғасуда. Қамауға алу және бұлтартпау шарасын таңдау туралы барлық қаулылар қылмыстық іс жүргізу заңнамасының талаптарына сәйкес прокуратурамен міндетті түрде келісе отырып және соттың санкциясымен қабылданған. Ұсталғандарға қатысты Қылмыстық кодекстің 272-бабы «Жаппай тәртіпсіздіктерге қатысу» бойынша тергеу басталды. Жиналған материал дәлелдемелік заттармен бірге Арнайы прокуратура қызметкерлерінің қарауына жіберілді», – деп қорытындылады облыстық ПД-ның өкілдері.
