Қаржы нарығын реттеу және дамыту агенттігінің өкілдері Ресей мен Беларусь азаматтары қазақстандық банктерде көптеген шот ашқанын мәлімдеді. Ведомство дерегі әлеуметтік желілердегі Ресей мен Беларусь азаматтарының елімізге келіп, жаппай шот ашып жатқаны туралы әңгімелерді растайтындай.
«2022 жылы 24 ақпаннан бері Қазақстан банктерінде Ресей мен Беларусь резидент-жеке тұлғалары үшін 11 940 шот ашылған. Оның ішінде 10 725 шотты өтініш берушінің немесе сенім білдірілген адамның Қазақстан банкінде жеке болуы арқылы, 1 215 шот қашықтан ашылған. Нәтижесінде, осы мемлекеттердің Қазақстан Республикасы банктерінде шоттары бар азаматтарының жалпы саны 162 мыңға жетті», – делінген хабарламада.
Ведомство мәліметіне сенсек, Ресей Федерациясының резидент-заңды тұлғаларының жаңа шоттарының саны жыл басынан бері аздап өскен. Биыл ақпанның аяғынан бері банк шоттары Ресейдің 7 компаниясына ашылған, Қазақстан банктерінде шоттары бар Ресей ұйымдарының жалпы саны 805-ке жеткен.
Банктер шетелдік өтініш берушіге КЖТҚҚ туралы заңда белгіленген KYC (Know Your Customer) стандарттары бойынша тексеру жүргізуге міндетті екенін ұмытпаған жөн.
