Қаржы мониторингі агенттігі Алматы прокуратурасымен бірлесіп, Қытайдан Қазақстанға халық тұтынатын тауарлардың аса ірі көлемде контрабандамен кіргенін анықтады.
Ведомство мәліметі бойынша, сотқа дейінгі тергеу Group of the Companies TDA ЖШС басшылығына қатысты қылмыстық кодекстің 234-бабы 2-бөлігінде, 1, 4 және 5-тармақтарында көзделген экономикалық контрабанда дерегі бойынша тіркелген.
«Фирманың барлық операциялық жұмыстарын осы ЖШС директоры атқарды. ҚХР-дан заңсыз өткізілген тауарлардың жалпы құны 585 миллион теңгеден асты. Бюджетке 125 миллион теңге кедендік төлемдер мен салықтар төленбеген», – деп мәлімдеді агенттік.
Алматының мамандандырылған ауданаралық тергеу соты ЖШС директорына қатысты күзетпен ұстау түріндегі бұлтартпау шарасын санкциялаған. Әзірге өзге ақпараттар тергеу мүддесіне сай жария етілмей отыр.
