Бокстан Қазақстан ерлер құрама командасы Пхукетте (Таиланд) өткен Thailand Open халықаралық жарысын үш алтын, екі күміс, үш қола медальмен аяқтады. Әлемнің 14 елінен 130 спортшы қатысқан додада Қазақстан құрамасы сапынан 11 спортшы бақ сынады. Турнирде 91 келіге дейінгі салмақ дәрежесінде чемпион атанған отандасымыз Айбек Оралбаймен әңгімелесудің сәті түсті.
– Айбек, сізді айтулы жеңісіңізбен құттықтаймыз! Пхукеттегі Thailand Open халықаралық турнирін қысқаша қорытындылап берсеңіз.
– Халықаралық турнир жоғары деңгейде ұйымдастырылды. Таи елінің ауа райына, уақыт белдеуіне бейімделу үшін жарыс өтетін аймаққа екі-үш күн бұрын бардық. Ел намысы сынға түскен бәсекеде бапкерлер құрамы қойған тапсырманы орындауға тырыстық. Турнирдің жоғары деңгейде өтуіне атсалысқан барша ұйымдастырушыларға алғысымыз шексіз.
– Жарысқа қалай дайындалдыңыздар? Бас бапкер қандай міндет жүктеді? Ұзақ үзіліс кері әсерін тигізбеді ме?
– Алдымен Алматыда ұлттық құрамамен бірге 15 күндей оқу-жаттығу жиынын өткіздік. Бір сөзбен айтқанда, Таиландқа тыңғылықты дайындықпен бардық. Ұзақ үзіліс кері әсерін тигізді деп айта алмаймын. Біздің бұған дейінгі жарысымыз ел чемпионаты болды. Ішкі біріншіліктен кейін де екі ай жаттықтық.
Бапкерлер әр турнирде жақсы өнер көрсеткенімізді, жүлдегер атанғанымызды, чемпион болғанымызды қалайды. Соған сай міндет жүктейді. Біз де бапкерлеріміз бен жанкүйерлеріміздің үмітін ақтауға барымызды саламыз.
– Таи елінде кіммен жұдырықтасу қиындық туғызды? Қай елдің боксын үздік деп бағалар едіңіз?
– Кейінгі кезде бокс барлық елде жоғары қарқынмен дамып келе жатыр. Сондықтан әр турнир сайын қарсыластардың да саны арту үстінде. Дәл мына елдің боксшысы мықты деп бөле жарғым келмейді. Барлығы да өз елдерінің үздік спортшылары екенін естен шығармауымыз керек. Сол себепті кез келген боксшыға құрметпен қарап, оларға қарсы кездесулерге тыңғылықты дайындаламын.
– Жазғы спорт түрлері бойынша ендігі негізгі бәсеке – Азия ойындары. Қытайдың Ханчжоу қаласында 10-22 қыркүйек аралығында өтетін турнирге қай боксшылардың баратыны белгілі болды ма? Оған іріктеу қалай жүргізіледі?
– Биылғы жылдың ең басты бәсекесі Азия ойындарына іріктеу аясында әзірге 4-5 турнир өтті. Оған дейінгі жарыстарға да қатысамыз. Содан кейін бас бапкер Қайрат Сатжанов Азия ойындарына баратын құрамды жасақтап, үздік деген боксшыларды іріктейді. Таңдау 8 боксшыға түседі. Мен де осы Ханчжоу қаласында өтетін жарысқа баруды мақсат тұтып отырмын. 4 жылда бір келетін турнирде чемпион атанғым келеді.
– Әңгімеңізге рақмет! Алдағы сайыстарда сәттілік тілейміз.
